Россия Президенти Владимир Путин быйыл сентябрь айында баьри де пенсионерлерге бир кере берилетаган 10 мынъ маьнет акша тоьлеви акында карарга кол баскан.

Сол карар ман байланыста Ногай район администрациясынынъ Ямагат палатасынынъ председатели Эльмурза Саитов оьз ойы ман боьлискен.
– Элимиздинъ етекшиси Владимир Путин «Единая Россия» Савлайроссиялык партиясынынъ ХХ курылтайынынъ экинши кезегинде шыгып соьйлевинде алатаган келимлери патшалык бюджети мен байланыслы аьдемлерге айырым маьне бермеге кереги акында белгиледи. Президент ислемейтаган эм ислейтаган Савытлы куьшлерининъ, сакатлыгы бойынша, баьри де пенсионерлерге 10 мынъ маьнет акша оьлшеминде бир кере тоьлев бермеге маслагат этти.
Куьзде пенсионерлерди тагы да бир неше янъылыклар куьтеди, айтпага, федераллык льготниклерге йыл сайын социаллык ярдамларын алувдынъ кебин туьрлентпеге ыхтыяр бериледи. Оларга, оьзлерининъ суьйимлигине коьре, социаллык ярдамлары акшалай яде кайдай да бир коьмек кебинде этилинмеге болады. Сол ок тоьлевлер аьелдинъ келимлеринде эсапка алынмаягы эм баска социаллык демевлигин алмага буршав бермееги бек маьнели.
Патшалыгымыздынъ басшысынынъ сондай карарын элимиздинъ яшавшылары эм Ногай районынынъ пенсионерлери макул коьредилер. Ол зат Путиннинъ ясуьйкен несили эм туьрли авырувлар ман кыйналатаган Россия гражданлары акында каьр шегуьвин аян шайытлайды, – деген Эльмурза Саитов.
* * *
Элимиздинъ етекшисининъ йогарыда белгиленген карары акында оьз ойын Ногай районынынъ Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев те билдирген.
– Элимиз бойынша коронавируслы юкпалы мараздынъ яйылувы ман байланыслы буьгуьнги енъил болмаган заманларда, элдинъ етекшисининъ карары бас деп ясуьйкен несилге бир кере берилетаган материаллык ярдамын этуьвге каратылады. Элбетте, сол акша оьлшеми коьп тувыл болса да, онынъ маьнеси уьйкен: ол зат, меним ойыма коьре, пандемия аьсеринде эм кайсы заманда да эсли аьдемлерге эс бермеге кереги акында билдиреди. Ол патшалыктынъ басшысынынъ эндигиден армаган да, келеекте, пенсионерлер эм ветеранлардынъ маьселелерин шешуьвдинъ йолларын излестируьв эм табув кереги акында берип турган белгиси болады. Олай дегеним, пенсиялар, пособиелер, туьрли социаллык тоьлевлерининъ оьлшемлерин оьстируьв, медициналык канагатлавдынъ сапатын ийгилендируьв, элимиздинъ ясуьйкен несили, аьр бир аьдем акында каьр шегуьв эм оны сыйлав керегеди, – деген ойын айтты Акманбет Сангишиев.
М.Юнусов.