Зульфия Отарова, Кадрия атындагы орта мектебининъ английс тилининъ окытувшысы: «Коронавируслы маразына карсы вакцинады этпеге яде эттирмей коймага керек пе?» – деген сорав аьр бир аьдем алдында турганына шекленмеймен. Сол сорав тек Россия Федерациясынынъ тувыл, бизим уьйкен болмаган Ногай районымыздынъ яшавшыларын да эки кесекке боьлди.

Биревлер саьатлеп вакцинация эттирмеге шеретке турганда, баскалар туьрли Интернет тармаклардагы билдируьвлерди окып, вакцинады шыгарганларды да, эттиргенлерди де яманлап, ойсыз хабарлар шыгарып турдылар, ама куьн сайын авырыганлар ман йолыгыслар мага ойланмага амал берди эм вакцинация уьшин аьдемлер ягына шыгарды. Меним вакцинация эттируьвим акында шекленуьв де босына тувыл, бир ерлерде вакцинадынъ пайдасы акында, баска ерлерде сол ойларга карсылас ойлар баспаланып турдылар. Мен ис борышыма коьре, коьп аьдемлер мен йолыгысаман, олай дегеним, окытувшыдынъ кесписи сондай. Ис йолдасларымнынъ коьбиси коронавируслы маразына карсы вакцина уьшин болган заманларда да, мен коьплердей болып: «Алайыма вакцинады, алсам, ызы кайдай болар экен?» – деген соравларды оьз-оьзиме бермей болмадым. Ызында – тек вакцина деп, явап бердим.
Аьли сол вакцинады алганыма бир оькинишим де йок, бу куьнлерде вакцинады алмаганларга «эттиринъиз» деп айтпайман, неге десе мен эпидемиолог та, иммунолог та тувыл. Тек мен дени сав келеектеги несил уьшин.