Домбыра – ногай миллетли халктынъ байыр анъ алаты болады. Аьвелгиде домбырады аьр бир аьелдинъ энъ де сыйлы орынына салып койганын коьретаган болганлар. Оннан сонъ, бир кесек заманга халкымыздынъ маданиятында бу сыйлы саз алатынынъ маьнелиги бираз туьсип кетти.

Йыллар оьтедилер, аьлиги заманда сол алатты кайтадан янъылландырган инсанларымыз да болдылар, солардынъ бириси Алибий Романов (яткан ери еннетли болсын), ол оьзи коьплеген ясларды да бу алатта ойнап та уьйретти. Ол ясаган домбыралар бу куьнлерде тек Россия Федерациясынынъ туьрли субъектлеринде тувыл, шет эллерге де кеткенлер. Соьйтип, домбыра халкымызга кайтып келди.

Сондай ярасык эм аьр бир ногай аьдемге якын анъ алатын яслар арасында таралтувга куьш салатаган окытувшылар да бар. Сол окытувшылардынъ бириси Ралина Махмудова, Сраждин Батыров атындагы саниятлар мектебинде бир неше балады оьз билимин аямай домбырада ойнап уьйретеди. Онынъ исининъ тамамы, балалар туьрли шараларда катнасып, коьрсеткен оьнерлери болады. Онынъ окувшылары кайсы шарада катнасса да, республика, район кезеклеринде яде болса, солардынъ тысында болсын савгалы орынларды аладылар.

Тек янъыларда Ралина Махмудовадынъ тербияланувшылары Даниил Кучелаев, Султан Сейлиев, Азиза Курганова «Камертон» деп аталган биринши халклар ара вокал саз-алатлар анъ шарасында ортакшылык эттилер. Бу шара онлайн кебинде озгарылды. Бу шарада оьз оьнерлерин домбыра сазын шалып эситтирген окувшылар савгалы орынларга тийисли болдылар. Айтпага, Даниил – биринши, Азиза ман Султан экинши дережели дипломлар ман белгилендилер.
Оьз окувшыларынынъ етимислери акында Ралина уьйкен куьези мен, суьйиниши мен хабарлайды. Оьзек те, олардынъ етимислери – окытувшыдынъ ис аьрекетининъ емислери.
Г.Курганова.
Суьвретлерде: енъуьвши домбырашылар.