Куьнбатар авылында Эсли аьдемлер куьнине багысланган «Картлык орынына шатлык болсын» деп аталган кызыклы шара болып оьтти.

Авыл администрациясынынъ меканындагы зал ишине авыл пенсионерлери йыйылдылар. Шатлыклы шарады халкымыздынъ белгили йырлавшысы Алибий Романов (яткан ери ярык болсын) туьзген «Шынъ» деп аталган балалар саз алатлар ансамбли ашты. Пенсионерлер уьшин даьмли эм таьтли аслардан сыпыра туьзилди.
Ясуьйкен несилге каратылган разылык соьзлерин шарады юритуьвши, авыл китапхана етекшиси Арапа Шекирова, «Айланай» патшалык фольклор-этнографиялык ансамблининъ солисти, айтылган кобызшы Бегали Куруптурсунов айттылар. Солай ок эсли аьдемлерди авылдынъ Ясуьйкенлер советининъ председатели Р.Кошекбаев, А.Межитова, Р.Шангереев, В.Янполова, З.Аджигельдиев, М.Боранбаев, Б.Оразбаев кутладылар. Ерли М.Курманалиев атындагы орта мектебтинъ окувшылары ясуьйкенлерге багысланган йырлар йырладылар, биювлер бийидилер.
Эсли аьдемлер оьзлерининъ йылы эскеруьвлери мен боьлистилер, суьйикли йырларын, сарынларын йырладылар, ятлавлар окыдылар. Байрам катнасувшылары маданият эм социаллык куллыкшыларына уьйкен разылыгын билдирдилер эм ийги йоравларын айттылар. Шатлыклы шара байрам кебинде ярык коьнъилли аьлде оьтти.
Авыл хабаршы.