Оьткен юма ишинде Ногай район администрациясында «Ногайский район» МР Депутатлар Йыйынынынъ кезекли сессиясы озгарылды. Онда Ногай районынынъ аькимбасы Мухтарбий Аджеков, авыл поселениелер аькимбаслары эм бир неше организациялар етекшилери ортакшылык эттилер.

Сессиядынъ ис куьнделигинде депутатлар Россия ОМВД-нынъ Ногай районы бойынша начальниги Наиб Каракаевтинъ 2021-нши йылда эткен аьрекетининъ сырагыларын ортага салып карадылар.
Сонъ Ногай район еринде наркоманиядынъ яйылувына эм наркотиклердинъ законсыз айланысына карсы аьрекет этуьв шаралар акында сорав ойласылды. Бу тема бойынша район аькимбасынынъ орынбасары Баймагомед Ярлыкапов эм Ногай ЦРБ-нынъ врач-наркологы Юпархан Нурлубаева шыгып соьйледилер. Врач Ю.Нурлубаевадынъ белгилеви мен, наркоманиядынъ яйылувы – маьселели соравлардынъ бириси. Ол тек яшавшылардынъ кавыфсызлыгына тувыл, социал-демографиялык аьлге де оьз себеплигин тийгистеди, неге десе бас деп ясларга зыян келтириледи. Онынъ айтувына коьре, ызгы 3-4 йыллар ишинде бу яктан аьл яман тувыл, районда бир наркоман да йок, ама эки аьдем наркотик- лер мен бирерде пайдаланадылар. Мектеб окувшылары арасында бу маьселе бойынша профилактикалык ис, солай ок тестирование оьткериледи.
Сол куьн солай ок «Авыл хозяйство управлениеси» МКУ-нынъ бас специалисти Эдил Маликовтынъ «Ногай районынынъ байыр подсобный, эгинши-фермерлик хозяйстволарында эм байыр предпринимательлерде авыл хозяйстволык мал саклав йорыкларды токтастырув акында» деген сорав бойынша билдируьвлери ортага салып ойласылды.
Сонъ Орта-Тоьбе авылыннан Ханболат Тангатарович Кулбусунов эм Уьйсалган авылыннан Казбек Абибуллаевич Шамбилов депутатлар эсабында етимисли аьрекет юриткенлери уьшин Сый грамоталар ман савгаландылар.
Суьвретте: Сый грамота тапшырув мезгилинде.