Йыл сайын, баслап район, сонъ республика кезеклеринде аьдетке кирген «Келеекке адым» деп аталган, яслардынъ билимлерин кенъейтер ниет пен, илми конференциясы озгарылады. Бу шарада бизим Ногай районымыздынъ коьплеген окувшылары катнасканлар, ишинде республика тувыл экеш, Россия Федерациясы бойынша озгарылган шара кезегинде енъуьвши болганлардынъ атлары да белгили болган.

Бу йыл сол шарадынъ республикалык кезегинде А-Х.Джанибеков атындагы мектебининъ оныншы класс окувшысы Мамат Ахмаджанов (суьвретте), окытувшысы Сабина Юнус кызы Атюгеевадынъ етекшилеви астында, савгалы экинши орынга тийисли болды. Маматтынъ илми куллыгы «Шынты дин тутувшылар яде алданганлар» деп аталган эди. Яс тергевши оьз куллыгын аьлиги заманнынъ баьлеси эм казасы – терроризмге багыслаган. Бу куллыкты язган шакларда Мамат оьзи окыйтаган мектебининъ психологы Эльмира Аметова ман, Терекли-Мектеб авылынынъ имамы Алимбек Арсланов пан, «Алданганлар» документальли фильмининъ авторы эм режиссеры Эльмира Кожаева ман йолыгысып, хабарласувлар юритти.
– Мен бу аьдемлер мен хабарласувымда оьзиме коьп янъылыклар аштым, боьтен де, мага Эльмира Юнусовна ман хабарлавым бек ярады. Мен оннан ол оьзининъ «Алданганлар» фильминдеги суьвретлерди кулланмага ыхтыяр алдым, сол суьвретлер акында мага шарадынъ республикалык кезегинде ортакшылык эткен эм меним куллыгыма баа бергенлер сорав да бердилер. Баьрисине де толы явабымды берип болдым. Шарада савлайы 2 мынънан артык окувшылар, заочный кебинде ортакшылык эткенлер, тек очный кебине 100 окувшы катнасувга ыхтыяр алган болган, коьз бе коьз коьрисуьвге шакырылган окувшылар айлак аз эди, солардынъ ишинде мен де болдым. Шарада биринши орын биревге де берилмеди, экинши орынга биз эки аьдем болып тийисли болдык, – дейди Мамат Ахмаджанов.
Яс илми тергевшидинъ алдында аьли де кенъ йоллар, солардынъ аьр бириси тегис болганды йорап, мектебининъ, халкынынъ атын ийгилик пен айттырганды сагынаман.
Г.Курганова.