Биз, Ногай районынынъ Кумлы авылынынъ ясуьйкен яшавшылары Аминат Муслимовна Кожаева эм Сайлав Бегалиевна Аджигайтарова, социаллык куллыкшыларынынъ кеспи байрамы алдында авылымызда бу тармак бойынша оьз ис аьрекетлерин йогары дережеде эм яваплы толтырып келген Зумруд Исаевага эм Нарбийке Коккозовага уьйкен савбол айтып, юрек разылыгымызды билдирмеге суьемиз.

Картлык шагы аьр кимге де заманы ман етеди. Сол тыныш болмаган шагымызда касымызда бизи уьшин яны авырыган, касымызда таяв болган эм ялгызлыкты сездирмеге бермеген аьдемлер болса, коьнъиллеримиз коьтерилип, баьри мунъшылыгымыз, авырувларымыз, сызлавларымыз таркап кетеди.
Зумруд эм Нарбийке-кызларымыз тез-тез бизим уьйлеримизге келип аманшылыгымызды, аьлимизди-куьнимизди сорастырадылар. Олар ясуьйкенди сыйлап билген, ата-анасыннан ийги тербия алган, касындагы аьдем уьшин яны авырыган, уьйкен аьдемшилиги болган кыскаяклылар боладылар.
Олар оьз ислерине мукаят, аьр бир тапшырылган куллыгын янын салып, сапатлы, таза, шугыл этпеге, яваплы толтырмага шалысадылар. Бизге олар керекли дарманларды, азык-туьликлерди эм уьйшиликте керекли затларды еткермеге, уьйимизди йыйыстырмага, ас-аспага ярдамласадылар. Биз олардынъ аьр бир келуьвин саклап турамыз.
Биз оьз ислерин яны ман суьйген бу эки кыскаяклыларды кеспи байрамы ман кутлай келип, олардынъ аьр бирисине берк ден савлыкты, аьел наьсибин, мол берекетти сагынамыз. Исинъиз сизге дайым суьйиниш аькелсин. Бизге эткен ярдамынъыз, яхшылыкларынъыз сизге эм аьеллеринъизге мынъ кайта ийгилик болып кайтсын!
Кумлы авылынынъ ясуьйкенлери Аминат Муслимовна Кожаева, Сайлав Бегалиевна Аджигайтарова.