Петербург халклар ара экономикалык форумынынъ барысында Дагестан Аькимбасы Сергей Меликовтынъ Россия Федерациясында Беларусь Республикасынынъ толы ыхтыярлы посолы Дмитрий Крутой ман йолыгысы болып озды, сонынъ сырагысында эки эл бойынша келисуьв туьзилди.
«Шоьл тавысы» республикалык газетасынынъ бас редакторы Эльмира Кожаева Дагестан эм Беларусь ара кабыл этилип алынган келисуьв акында оьз ойын айта берип, булай деп белгиледи:
– Дагестан оьзининъ социал-экономикалык оьрленуьвинининъ янъы дережесине шыгады.
Дагестан ман Беларусь коьптен бери промышленность производствосы эм савда, архитектура эм курылыс, енъил промышленность, агаш асыллав, илми эм билимлендируьв, маданият тармакларында, конфессиялар эм миллетлер ара катнаслар бойынша биргелес аьрекетлигин бардыратаганы янга якын. Беларусь элинде оьмир суьрип, куллык этетаган дагестанлылар коьп. Бизде, белгилейик, Беларусь элиннен еткерилетаган импорт кенъ пайдаланады. Бизим кыскаяклылар онда кетен (лен) эм атлас кумашлардан тигилетаган кийимлерди суьйимлик пен киедилер. Менимше, Дагестан да, оннан сатып алып болганлай, оьз промышленность продукциясы ман да боьлиспеге болаяк. Солай ок промышленность тармагында биз Беларусь предприятиелери мен кооперация негизинде аьрекетлемеге болаягымызды билдиремиз.
Бу йолыгыс сырагысында республикага аян пайдалыгы болаягында шекленмеймен. Эм аьли, санкциялары ман байланыста аьлди анълап, бизге ийги дослыгы бар эллери мен аян аьрекетлик этуьв тармаклар бойынша бас деп эки як интеграцияды беркитпеге керек. Бу форум барысында, кол салынып, беркитилген келисуьвдинъ эки де элге пайдалыгы эм етимислиги бар экенин сенимлик пен айтаман, – деди Э.Кожаева.