Дагестан Аькимбасы Сергей Меликовтынъ етекшилиги астында ДР-нынъ экономикасынынъ оьрленуьв берклигин канагатлав бойынша, тыскы факторларды эсапка алув ман, Оперштабынынъ кенъеси болып оьтти. Кенъесте Дагестаннынъ биринши вице-премьери Руслан Алиев республика экономикасын оьрлендируьв бойынша коьрилетаган шаралар акында хабарлады.
Аьли социал-экономикалык политикасы етимисли бардырылатаганынынъ маьнели коьрсеткиши – гражданлар келимлери. Ийги коьрсеткишлерге етисуьв уьшин сатып-алув керексинуьвлерди якламага, бизнес, Дагестан калалар эм авыллар амалларын арттырмага керек.
РФ Оькиметининъ токтасувы ман Дагестанга уьйкенлерди эм балаларды эмлевде медициналык ярдамын тийгистетаган медорганизацияларды медициналык савыт-садак пан яракландырув бойынша шараларды озгарувга 339,3 млн. маьнет акша шыгарылган.
Яшавшылардынъ ис пен каьрлевине эм социаллык онъланувына себеплигин тийгистетаган 81 предприятелер бар (алдын бу сан 67 эди).
ЖКХ-дынъ оькиметлик билдируьв тармагында турак-коммуналлык буйымлар битируьв акында билдируьвлерди ерлестируьв акында ДР Оькиметининъ Председателининъ биринши орынбасары Манвел Мажонс хабарлады.
Дагестаннынъ коьлик тармагы санкциялар ман сынавды оьтти: коьликтинъ баьри кеплери бойынша ийги аьл сакламага эп болды.
– Россия кубыласынынъ аэропортлары уьстинде ава коьлигин кулланув бойынша киритилген тыйдажылыклар «Махачкала» («Уйташ») аэродромына аьрекетин бардырувга буршавлык этпейди, ол аьдеттегидей болып ислейди эм бу йыл да туристлерди карсы алмага аьзир. Тек оьткен май айынынъ байрам куьнлеринде мунда 70 мынъга ювык пассажирлер канагатланды, ол, оьткен йылдынъ сол болжалы ман тенълестиргенде, 17 процентке артык.
Баьриси биринши кварталдынъ сырагыларына коьре аэропортта 442 мынъ пассажирлер канагатланды, ол оьткен йылдагы коьрсеткишиннен 12 процентке артык.
Халклар ара йоллар ман товарларды еткеруьв амаллары коьриледи. Дагестан эм Беларусь Республикалары ара эки як комиссиялар аьрекети мен, Дагестаннынъ коьлик инфраструктурасынынъ, сонынъ ишинде Махачкала портынынъ куватлыгын кулланув ман Минск каласынынъ автомобиль эм тракторлык заводларынынъ, Беларусь автомобиль заводынынъ техникасын Азия-Тихий тенъиз регионынынъ эллерине еткеруьв амаллары каралады, – деп хабарлады кенъесте ДР коьлик эм йол хозяйство министри Джамбулат Салавов.
