Уьстимиздеги йылдынъ навруз айынынъ басында Тарумов районынынъ военный комиссариатында, муниципалитет пресс-службасынынъ билдируьви мен, Тарумов районынынъ аькимбасынынъ орынбасары Али Алиевтинъ етекшилиги мен ясларды 2023-нши йылда язлык шакырувга аьзирлик коьруьв эм оны озгарув соравлары бойынша кенъес озгарылды. Али Алиев белгилегенлей, Россия бойынша язлык шакырув кампаниясы коькек айынынъ 1-нши куьниннен алып шилле айынынъ 15-нши куьнине дейим озгарылаяк.
А.Алиев ден савлыгы бойынша аьскерлик службасын оьтпеге ярайтаган эм онынъ сырасына шакырувга тийисли гражданлардынъ саны бойынша шакырув комиссия агзаларында ашык суьврет болмага керегин белгиледи. ВУС етекшилерине эм авыл аькимбасларына оьз ерлеринде яслар ман эм олардынъ аьел агзалары ман шакырув ман байланыслы шараларга военкоматка келмеге кереги акында билдируьв кампанияды белсенлетпеге тапшырылды.
Тарумов эм Ногай районлар военный комиссары Александр Мельников гражданларга повестка берилуьв йорыгы акында эм онда авыл аькимбасларынынъ эм ыхтыярды саклав органларынынъ ваькиллери де ярдамласаяклары акында билдирди. А.Мельников аьскер сырасына шакырувдан босатылган эм закон негизи бойынша кесек заманга калган, муниципаллык район еринде яшамайтаган эм пропискасы да болмаган гражданларды аянлав нитетте аьр бир авыл еринде призывниклер списогын тергев керегин де белгиледи. 2022-нши йылда куьзде оьткен шакырувдан бас акашкан гражданлары бойынша да айырым сорав каралды. Йыйылыс пунктына гражданларды аькелуьви, баска болып, йыйылыс пунктына келуьв уьшин оларга повестка берилуьви эм алдын службады оьтуьвден бас акашкан гражданларды аянлав исин уйгынлавын тергев бойынша токтас та алынды.
Суьвретте: шарадан коьринис