Ногай районынынъ Терекли-Мектеб авылында Дагестан Республикасынынъ Халк язувшысы Бийке Кулунчаковадынъ мерекели шарасы оьтти.
Бийке Исхак кызы Кулунчакова – Россия Федерациясынынъ ат казанган маданият куллыкшысы, публицист, журналист, драматург, С.Стальский атындагы республикалык баргысынынъ лауреаты. Мерекешиди кутламага Дагестан Республикасынынъ бас каласы Махачкаладан, Бабаюрт районыннан, Карашай-Шеркеш Республикасыннан конаклар келгенлер.
«Ногайский район» МР администрациясынынъ аькимбасынынъ атыннан хошлав адреси мен район басшысынынъ орынбасары Баймагомед Ярлыкапов шыгып соьйледи. Оьз соьйлевинде ол Бийке Кулунчаковады талаплы излевши, шаир, кара соьздинъ иеси экенин белгиледи.
– Бийке Кулунчаковадынъ шыгармалары окувшыларды тербиялайды, язувшы нызамлык, эдап, патриотизм эм суьйим соравларын коьтереди. Сизге ден савлык, ийгилик, тынышлык йораймыз. Яратувшылык сизди бир де калдырмасын, – деп йорады ол язувшыга.
Солай ок ногай язувшыды Дагестан Республикасынынъ Халк шаири Багаутдин Аджиев, лак тилинде шыгатаган журналдынъ редакторы Хизри Ильясов, табасаран тилинде «Дагестан хатыны» журналдынъ редакторы, Дагестан Республикасынынъ правлениесининъ секретари Сувайнат Кюребекова, КЧР Ногай районынынъ Советининъ депутаты Адлер Туркменов, сол ок районнынъ маданият управлениесининъ етекшиси Эльвира Аксиева, «село Терекли-Мектеб» СП МО аькимбасы, Россия ногайлар ФНКА Дагестан региональли боьлигининъ председатели Зейдулла Аджибайрамов, «Шоьл тавысы» республикалык газетасынынъ бас редакторы Эльмира Кожаева, Ногай районынынъ Хатын-кызлар советининъ председатели Асият Манкаева, Геметюбе авыл мектебининъ директорынынъ орынбасары Разият Амангулова, ногай шаирлери Магомет-Али Ханов, Салимет Майлыбаева, Гульфира Бекмуратова кутладылар. Яратувшылык кешликти уйгынлады эм юритти Дагестан Республикасынынъ ат казанган маданият куллыкшысы Сабират Абубекерова. Концерт программасында белгили йырлавшылар катнастылар, кешликте Бийке Кулунчаковадынъ ятлавларын яттан окыдылар. «Тенъ болганда соьйлермиз» деген повестьтен уьзикти Ногай драмалык театрынынъ актрисасы Саида Кельдасова окыды, аккомпаниатор Бегали Куруптурсунов. Терекли-Мектеб авылынынъ Кадрия атындагы орта мектебининъ 3-нши классынынъ окувшысы Аниса Рашидова «Меним балалыгымнынъ орамы» повестининъ уьзигин окыды.
Ногай шоьлдинъ талаплы кызы Бийке Кулунчакова кешликти аьзирлегенлерге, конакларга оьз разылыгын билдирди. Кешлик коьнъил коьтерилисте оьтти.
Г.Абдулакимова, Россия Язувшылар союзынынъ агзасы.
