Оьткен юмадынъ ишинде А-Х.Джанибеков атындагы мектебининъ китапханасында китапхана етекшиси Гульнара Абубекеровна Агаспарова эм ногай тил сабагыннан окытувшысы Зухра Умаровна Мавлимбердиевадынъ уйгынлавы ман 9-10-ншы класслардынъ окувшылары ман окув конференциясы оьткерилди.
Бу куьнги шара Бийке Исхак кызы Кулунчаковадынъ шыгармаларына багысланган эди. Шарады мектебтинъ окувшылары Мухаммад Мусаев эм Айсель Шандиева бек аьруьв этип юриттилер. Олар баслап Бийке Кулунчаковадынъ яратувшылыгы акында ногай эм орыс тиллеринде йыйылганларга айтып оздылар. Оннан сонъ биринши соьзди Зухра Умар кызы Мавлимбердиевага бердилер. Ол болса, окувшыларга бу куьнги мерекеши Бийке Исхак кызынынъ шыгармалары акында хабарлап, автор кайдай темаларга уьйкен маьне беретаганын айтып, айырым «Казбек» шыгармасында токтады.
– Бийке Кулунчакова «Казбек» шыгармасында суьйим темасын коьтереди. Аьдемнинъ янын авыртады Казбектинъ анасы оьлетаган ери, ол, ызгы тынысы болса да, оьзининъ бес ясындагы увылы етим калаятырганына бек кыйналады, а кишкей Казбек анасына янаспага сол заман бек коркады. Ол анасыннан сонъ, оьгей анадынъ колында калып, енъил яшавды оьтпейди, тек суьйим сезими келгенде, онынъ яшавы туьрленеди…
Сизде, балалар, бу шыгармады окыганда кайдай сезимлер тувдылар? Автордынъ коьтеретаган темасы сизге ювык болады, неге десе бас герой сизи мен яслы кеде, – деген соьзлер мен Зухра Умар кызы Мавлимбердива оьз соьйлевин тамамлап, окувшыларды тынълавга шыкты.
Бийке Кулунчаковадынъ шыгармалары бойынша озган окув конференциясына окувшылар бу куьн бек яхшы аьзирленгени сезилмей болмады. Бир неше йыллар артта балалардынъ орыс тилинде аьруьв соьйлевине сукланатаган болган болсанъ, аьлиги заманда ногай тилинде ийги соьйлеген балаларды коьрсек, сейиримиз калып, бир ерлерде тынысымызды тартып, тынълап каламыз.
Мектеб окувшылары А.Аджигельдиева, А.Телемишева, М.Ахмаджанов, А.Култаева, А.Саитова, А.Аджиева, Л.Оразбаева, Х.Эспергенов, Б.Башантавов Бийке Исхак кызынынъ шыгармалары бойынша, оьзлери тешкеруьвли окып шыкканнан сонъ, хабарлап, оьз ойларын айтып кеттилер.
Элбетте, балалар автордынъ шыгармалары бойынша орыс эм ногай тиллеринде хабарладылар. Сол да дурыс, неге десе автор эки тилде язган эм язады.
Сейирим калып, уьйкен сукланув ман Айханум Телемишевадынъ яттан ятлав окувын эм Мамат Ахмаджановтынъ соьйленисли хабарлавын тынъладым. «Неге?», – деген соравды бермеге болатаганлар да болар, явабы булай: «Бу окувшылардынъ ана тилинде коьп соьйлейтаганлары сезиледи, бир ерде де тартынув да коьринмеди, эм олар аьр бир соьйлеген соьзлерин анълап айттылар. Сондай окувшыларды, яс несилди коьрсем, эситсем, юрегиме куваныш энип, куьезленемен, эм менде келеекте миллетимиздинъ болаягына сеним тувады.
Шарадынъ сонъында китапхана куллыкшысы Гульнара Агаспарова йыйылганларга Ф.Бакчиевтинъ китабин коьрсетип, сонда Бийке Кулунчакова ман хабарласув да баспаланганы акында айтып, автордынъ бир неше соравларга берген явапларын окып кетти.
– Эгер сизди китап кызыксындырган болса, келип, окымага, китап пен ювык таныспага боласыз, а бу куьнги шарага аьзирленгенинъиз бек ярады, келеекте де сизи мен бир неше шаралар озгарармыз, – деди ол.
Г.Сагиндикова.
Суьвретте: А-Х.Джанибеков атындагы мектебинде Б.Кулунчаковадынъ шыгармаларына багысланган шарада.
