Сары тамбыз айынынъ 25-нши куьнинде, Ногай районынынъ Терекли-Мектеб авылынынъ «Аминка» деген банкет залында «Мектебке балаларды йыйна!» деген йыл сайын озгарылатаган саваплык акция уйгынланып оьтти.
Акция «Инсан» саваплык фонды эм «Гьидаят» кыскаяклылар орталыгы ман бирге Ногай районы бойынша имамлар советининъ председателининъ баславы ман уйгынланган эди. Шарада коьп балалы эм аз аьжетсизленген аьеллерден балаларга оьз йоравларын эм кутлав соьзлерин «Ногайский район» МР администрация ислери бойынша управлениесининъ етекшисининъ куллыгын кесек заманга юритуьвши Зухра Аджиманбетова, Терекли-Мектеб авыл имамы Мухаммад Атангулов, Билимлендируьв управлениесининъ методисти Байрамали Бекмурзаев, Россия ОМВД Ногай районы бойынша ясы етпегенлердинъ ислери бойынша инспекторы Арслан Рахмедов эм «Инсан» саваплык фондынынъ етекшиси Абдулазиз Муллаев айтып кеттилер. Келген конаклар балаларды яшавындагы энъ маьнели оьзгерислерининъ бириси – билим дуныясына биринши кере абыт алувы ман кутладылар. Саьбийлерге берк ден савлык, окувда йогары етимислерин сагындылар. Шара уйгынлавшыларына оьз разылыкларын билдирдилер. Байрамда янъы окув йылын баслаяк окувшыларга канцелярия салынган я́ нъы́ портфельлери де тапшырылдылар. Шарады́ уьйкен усталык пан Мавлидин Толубаев юритти. Байрамга шакырылган балаларга деп туьрли зияпетли сыпыралар да туьзилген эдилер. Саваплык акциядынъ сонъында аниматорлар ман уйгынланган шоу ойынлары, ер-ерде илинген туьрли туьсли шарлар, коьнъилди коьтерген туьрли анълар байрамга йыйылган саьбийлердинъ юзлерине куваныш куьлкиди, коьзлерине наьсип нурларын косты. Сол куьн байрамда ортакшылык эткен аьр бир саьбий оьз уьйине янъы окув йылында етимисли окымага деген мырат пан йогары коьнъилде йолланды. Солай болып, шара уйгынлавшылары меканды тегин бергени уьшин «Аминка» банкет залынынь иеси Джамалдин Межитовка эм шарады озгарувда спонсорлык ярдамын эткен Терекли-Мектеб авыл яшавшысы Рашидхан Арслановка уьйкен разылыгын билдирдилер. Соьйтип, «Мектебке балаларды йыйна!» деген саваплык акция йогары коьнъилде оьтти. Г.Нурдинова. Суьвретте: акция катнасувшылары.
