Конъысы Кизляр районында ногайлар яшайтаган бир неше авыллар орынласканлар. Солардынъ бириси Огузер авылы болады. Вагидат Толегеновна Давутова (Куртусунова) сол Огузер авылында тувып-оьскен. Мине коьп йыллар бойы ногай кыскаяклы Огузер авылында орынласкан 32- нши номерли авыл китапханасын етекшилеп келеди. Вагидат Толегеновна 1962- нши йылдынъ казан айынынъ 4- нши куьнинде Огузер авылында тувган, ерли мектебинде билим алган.
1982-нши йыл Дагестаннынъ совхозлар эм колхозлар уьшин етекшилевлерин аьзирлев бойынша авыл хозяйстволык техникумын етимисли тамамлаган. Оннан сонъ Нальчик каласындагы Кабарты-Балкар агромелиоративлик институтында билим алган, ама Вагидат оьз кесписи бойынша куллык этпей, мине коьп йыллар бойы яшавын авыл китапханасынынъ ис аьрекетине багыслап келеди. 1988-нши йылдан алып ол Огузер авылынынъ китапханасынынъ яшавын авыл яшавшылары, мектеб окувшылары уьшин кызыклы этпеге, олардынъ аьр кайсысынынъ яшавына ийги туьрленислер киргистпеге шалысады. Айтпага, китапханадынъ уьндиригинде ногай тилинде китаплерининъ саны аз болса да, ол йыйы ана тилинде шараларды озгармага амал этеди. Оны ман китапхана окувшылары уьшин ногай язувшылары, шаирлери, айтпага, Г.Мурзаевадынъ, К.Темирбулатовадынъ, Б.Кулунчаковадынъ яратувшылыгына багысланган китап выставкалары, амалламалары уйгынланганлар. Баска болып, онынъ етекшилиги мен китапхана туьрли Савлайроссиялык, республика, район бойынша оьтетаган акцияларында, флешмобларда катнасады, онда туьрли мерекелерге, белгили оьзгерислерине, байрам куьнлерине багысланып шаралар озгарылады. Китапханадынъ оьз сайты да бар, онда китапханадынъ аьр куьнлик белсенли аьрекети коьрсетилип келеди. 2020-ншы йылдагы етимисли аьрекетининъ тамамы бойынша Огузер авыл китапханасы 100 мынъ маьнет грантына тийисли этилген. Авыл китапхана етекшисининъ белгилеви мен, сол амал аркалы келеекте китапханадынъ иши кеплендирилеек.
Вагидат Толегеновна оьз бактысын авар миллетли яс Вагаб пан байлаган, олардынъ аьелинде эки сылув кызлары Рукият эм Жанэта эм балдан таьтли уьш уныклары куьезин оьстирип келедилер. Кызлары экеви де йогары билимин алып, Сургут каласында оьз сайлаган кеспилери бойынша куллык этип келедилер.
Алдымыздагы келеятырган Хатын-кызлар байрам ман Вагидат Толегеновнады ак юректен кутлаймыз. Берк ден савлык, ис аьрекетинде коьп етимислер йораймыз.
Г.Нурдинова.
Суьвретте: Вагидат Давутова.
