Ювык аьдемлер дуныядан кешип кетсе, ынанмайсынъ. Ойлайсынъ, мине аьли эсик ашылар эм сен онынъ кирип келгенине кайтип куьшли суьйинерсинъ. Оькинишке, сондай аьлеметлер болмайдылар. Меним ювык аьдемим, коьплеген йыллар тек исимиз бойынша катнасып калмай, кардаш-тувганларымнынъ сырасына кирген, белгили ногай язувшысы, журналисти Магомет Кожаев арамыздан кеткени баьримизге де кайгылы болды.
Кожаевлердинъ аьели мен биз коьплеген йыллардан бери кудалык тутамыз. Сол ювыклыгымыз шынтысы ман да мынъйыллык болып келеятыр, оьзимди билген шаклы, сол катнасларды да билемен.
Меним насихатшыларым деп оьктемсип айтаман мен Мурат Авезов эм Магомет Кожаев акында. Буьгуьнлерде бу йойым меним де, оны ман коьплеген йыллар дос болып юрген Мураттынъ да мойынын кеседи.
Магомет Янмурза увылы коьплеген йыллар етекшиледи «Шоьл тавысы» газетады. Оьз исин бек суьетаган, билетаган эди, яс журналистлерге де билимин беретаган эди. Ис йолдасларымнынъ бириси айтканы эсимде: «Магомет Янмурза увылы баьри жанрларда да йогары кеспили язып болады». Сол соьзлер ушын. Неше кере де акырган заманлары бар эди, ама ол мени халк анълагандай этип коьширмеге уьйреткенине ога бек разыман.
Шаирлик пен кызыксынувымды да бек хош коьретаган эди. Меним ятлавларымды биринши болып окып, оьз ойын айтатаган эди. Орысша язылган ятлавларымнынъ бир нешевин де коьширген. Сонъында оьзининъ шыгармаларын да мага окытып, «сенинъ ойынъ калай?» деп сорайтаган эди. Мен сол заман бир оьктемсийтаган эдим. Буьгуьнлерде куьшли деген шаир болмасам да (бир нешевлер соьйтип ойлайдылар), оьзимди ийги журналист деп санайман. Сонынъ уьшин оьз разылыгымды шынты журналист, шаир Магомет Кожаевке билдиремен. Эм аьр заман ол меним эсимде болаяк.
Буьгуьнлерде баьримиз де кайгырамыз. Мен Кожаевлердинъ аьелине бассавлык йорап, калганлар аман турсын деп айтаман. Энъ де ювык аьдемим, Фатима-энемнинъ кайгысын боьлисип, аьли де коьп йыллар суьйикли аданасынынъ балаларына тирев эм коршалавшы болып турганын суьемен.
Кетедилер йыракларга шаирлер… оьзлериннен сонъ данък калдырып, яны ман, юреги мен айтылган Соьз калдырып…
Г.Бекмуратова.
Суьвретте: М.Кожаев С.Джумаев пен.
