Янъыларда китапханалар куллыкшылары кеспи байрамын белгиледилер. Биринши караска, олардынъ куллыгы тынышлы болып коьринеди, ама бу куллыкты баьри аьдемлер де бажарып болмайдылар. Китапханашы оьзи китапти суьймеге эм баскаларга да маслагат бермеге керекли.
Китапханалар – китаплер тек берилип коятаган ер тувыл. Мунда ислейтаган инсанлар баскаларга китап сайламага коьмек этедилер, соьйтип олардынъ менлигининъ, ойларынынъ кепленуьвине демевлик бередилер. Китапханага келген аьдемди йылувлык пан хош алув, ога керекли маслагат беруьв, билимли болув – китапханашыдынъ шынты касиетлери. Сол касиетлердинъ иеси – Кумлы авыл китапхана етекшиси РабиятАкманбет кызы Менлиалиева. 1998-нши йылдан алып ислейди ол авыл китапханасында. Онынъ тувган авылы – Кумлы. Мунда онынъ балалыгы да, яслыгы да оьтти. Авыл ясы Зейдула Казтувган увылы Менлиалиев пен аьел де курып, балалар оьстирдилер, асырадылар. Буьгуьнлерде олар авылдынъ белгили, берекетли аьеллердинъ бириси деп саналадылар.
Оьз куллыгын юреги мен суьеди Рабият Акманбет кызы.
– Китапханада коьбисинше мектеб окувшыларын аьжетсизлеймен, оларга китапхана, йигерлик дерислер, язувшылар-мерекешилерге багысланган шаралар, адабиат саьатлер озгараман. Биз китапханада авыл имамы, ыхтыяр саклав органларынынъ, медициналык тармагынынъ куллыкшылары ман, авылдынъ, районнынъ белгили аьдемлери мен йолыгыслар озады, – деп айтады китапханашы.
Рабият Менлиалиева ийги иси уьшин ДР Оькимети, ДР маданият министерствосы, Ногай район администрациясы, ЦРБ етекшилеви атыннан Сый грамоталарга тийисли болган. Ол «Дагестан Республикасында энъ де ийги китапхана» деген конкурста катнасып, ДР Аькимбасынынъ грантына тийисли болган. Рабият Акманбет кызы район бойынша да энъ де ийги китапхана куллыкшысы болган, ога баргы этип проектор тапшырганлар. Китапханашыдынъ айтувы ман, авыл яшавшылары китапханага келедилер. Олардынъ аьр бирисине Рабият Менлиалиева йылы соьз, туьз маслагат табады, янъылыклар ман таныстырады. Оьз куллыгын суьйген инсан китаплерди окымага бек суьеди, баскаларга да сол суьйимди коьширеди. Биз Рабият Акманбет кызына аьли де коьп йыллар суьйикли куллыгын бардырганын сагынамыз, ден савлык, узак оьмир эм коьплеген ийгиликлер йораймыз.
Г.Бекмуратова.
Суьвретте: Р.Менлиалиева йиени мен.
