Оьнерли балалар – бизим ярык келеектегимиз. Ызгы заманларда сондай талаплы балаларды коьтергишлев уьшин аз патшалык программалар яшавга шыгарылмайды. Сол да оьнерли кызларга эм увылларга айлак уьйкен демевлигин этеди. Уллы тарихи болган ногай халкымыздынъ кишкей кызы Роза Залимхан кызы Колебаева янъыларда миллетининъ атын Россия Федерациясына занъыратып шыгарды. Олай дегенимиз, караша айынынъ басында Москва каласында «Халк саниятынынъ юлдызлары» деп аталган Савлайроссиялык фестивалининъ гала-концертинде Роза Залимхан кызы бурынгы фольклорымыздан «Ак шалув» йырын йырлап, ортакшылык этти.
Бу фестиваль Россия Федерациясынынъ маданият министерствосы эм В.Поленов атындагы Россиядынъ халк яратувшылык патшалык уьйининъ куьш салувы ман уйгынланды.
Айтып озайык, фестиваль баслап, аьлиги аьллерге коьре, коронавируслы маразга болып, коьп ерлерде тыйдажылык салынатаган заманда, онлайн кепте коькек айында озгарылган эди. Сол заманда мунда эки юзге ювык биюв, анъ эм тагы баска оьнерли коллективлер, айырым солистлер катнаскан эдилер. Сол санда бизим кишкей, яркырап янган юлдызымыз Роза Залимхан кызы да бар эди. Ол оьзининъ бар талабын онлайн кебинде коьрсетип, 20 ийги дегенлер ишине кирди эм шарадынъ лауреаты болды. «Халк саниятынынъ юлдызлары» деп аталган фестивальде катнасканлар миллет маданиятынынъ эм россиядынъ туьрли регионларынынъ халк яратувшылыгынынъ туьрлилигин коьрсеттилер.
Шарада катнасканларды ЮНЕСКО ислери бойынша РФ комиссиясынынъ агзасы В.Поленов атындагы ГРДНТ етекшиси, Россия Федерациясынынъ ат казанган саниятлар аьрекетшиси, маданият асабалыгын саклав бойынша комитетининъ председатели Тамара Пуртова хош коьрип алды эм бу куьнги байрам ман аьр бирисин айырым кутлап, статуэтка ман диплом тапшырды.
Роза – Залимхан ман Бурлиант Колебаевлардынъ тунъгыш баласы. Бу бала дуныяга энгенде, тетеси Насипхан унык кызына тек наьсипти йорап, оьзининъ анасы Розадынъ аты ерде калмасын деп, атады. Бу атты бизим оьнерли кызымыздан алдын юриткен уьйкен энейи де бек шандаз, коьзлери коьк буздай, бек ярасык кыскаяклы эди. Аьли Роза атын юриткен кыздынъ оьнери йырда.
Роза Колебаева айлак кишкейлей сахнага шыкты. Ол балалар бавына юретаган заманларда биз онынъ оьнерин район кезегинде озгарылатаган байрамларда коьретаган эдик. Йыллар озадылар, соны ман бирге оьседи бизим Розадынъ да талабы.
Оьзининъ он йыл яшав оьмирине ол аз етимислерге етиспеди. Онынъ артында – не шаклы ятлав эм йыр шаралары. Аьли уьшин сол катнаскан шараларда алган Сый грамоталарын, разылык хатларын эм баскалай савгаларын онынъ атайы Мурзагельди мен тетеси Насипхан бек аявлап саклайдылар. Оьзлерининъ юреклериндеги оьктемлиги мен унык кызы акында хабарлайдылар.
Онынъ коьплеген савгалары ишинде энъ сыйлысы Дагестан Республикасынынъ аьдетли маданиятына эм халк яратувшылыгынынъ оьрленуьвине эткен косымы уьшин «Дагестаннынъ яны» деген ДР Оькиметининъ премиясынынъ лауреаты болганы акында дипломы болады.
Розадынъ уьстинликлерине, етискен етимислерине тек онынъ атасы ман анасы, атайы ман тетеси суьйинип калмайды, суьйинемиз олар ман косылып биз де – савлай ногай халкымыз. Куьез тувыл ма Россия Федерациясынынъ уьйкен сахнасына шыгып, ногай миллетли кыздынъ аты аталса.
Г.Сагиндикова,
РФ Журналистлер союзынынъ агзасы.
Суьвретте: Роза Колебаева уьйкен сахнада.
