Азык-туьлик кавыфсызлыгы кайсы бир патшалыктынъ да миллет кавыфсызлыгынынъ бас кесегининъ бириси деп саналады. Азык-туьлик кавыфсызлыгынынъ бас ниети – элимиздинъ яшавшыларын сапатлы эм сенимли ший мал эм тамак азыгы ман иркуьвсиз канагатлав. Сонынъ бас борышларынынъ бириси деп аталык азык-туьликтинъ негизли туьрлилерин ислеп шыгарувды токтавсыз оьрлентип барув болады эм солар сол ок заманда элимиздинъ азык-туьлик бойсынмаслыгын канагатлав уьшин керек шаклы оьлшемде болмага тийисли.

Авыл хозяйство продукциясын аьзирлевшилердинъ бириси Ногай районынынъ Бораншы авылынынъ «Кадар» эгинши-фермер хозяйствосынынъ басшысы Аглархан Омаров болады. Янъыларда район орталыгы Терекли-Мектеб авылында оьткен авыл хозяйство ярмалыгында ол халкка рынок бааларыннан тоьмен этип оьз коллары ман оьстирген аьруьв сапатлы кой этин сатувы ман эсте калды.
Аглархан Омаровтынъ Бораншы авылынынъ ювыгында оьз мал котаны бар эм ол сонда эндиги 20 йылдан бери ана койлар отарын оьстиреди. Мунда ол аьели мен бирге куллык этеди. Фермердинъ 450 гектар мал отлакларыннан оьзге эгин ерлери йок. Сол себептен ога малын кыслатув уьшин керекли пишен-емди кырдан сатып алмага туьседи. Болса да, сога карамастан, Аглархан малшыдынъ енъил болмаган куллыгын тийисли кепте юритеди. Сога онынъ аьли де бала шагында ата-анасыннан алган ис суьерлиги ийги негиз болады.
– Койшыдынъ куллыгы – мен уьшин аьдетли ис аьрекети, сол зат – меним сав яшавым: шоьл кенълиги, оьленлер, тыныш отлаган койлар, уьстимдеги коьп-коьмек аспан куьмпези. Сонынъ уьшин де куьш-карувым болган шаклы ислеекпен, неге десе биревге оьтпек оьстирмеге, баскага балаларды окытпага, аьдемлерди эмлемеге, а бизге, малшыларга, район, республика уьшин эт-суьт продукциясын аьзирлемеге керек болады. Хозяйствомда солай ок тувар мал да саклайман. Менде кайдай йорав бар дейсиз бе? Ислемеге буршав бермесинлер. Биз, авыл хозяйство товарларын аьзирлевшилер, ерди, оьзимиздинъ енъил болмаган куллыгымызды суьемиз. Сондай ерге суьйимлик эм ис суьерлик яшаган шаклы элимиз де азык-туьликсиз калмас деп сендиремен, – деген ойын билдиреди Аглархан Омаров.
М.Юнусов.
Суьвретте: Аглархан Омаров оьз хозяйствосында оьстирген эт продукциясы ман ярмалыкта.