25-нши июльде Ногай район орталыгы Терекли-Мектеб авылында Дагестан Республикасынынъ Конституциясы куьнине багысланган авылхозяйстволык ярмалык болып оьтти.

Авыл яшавшыларына районнынъ фермер хозяйстволары оьз коллары ман оьстирилген авылхозяйстволык продукциясын рынок бааларыннан тоьмен этип саттылар. Айтпага, кой эм козы этлери – 350 маьнеттен, эшки эти – 300 маьнеттен сатылды. Ярмаркага этти фермерлер: Кумлы авылдан Садин Динисламов («Садин» КФХ), Бораншы авылдан Аглархан Омаров («Кадар» КФХ), Нариманнан Гульзара Бальгишиева («Бальгишиева Г.Т.» КФХ) аькелдилер.
Ярмаркада солай ок рынок баасыннан тоьмен оьлшеминде бийдай да сатылды. Эгинши-фермер хозяйстволарынынъ басшылары: Уьйсалган авылдан Кайтарбий Биймурзаев («Идрис» КФХ), Терекли-Мектебтен Солтанат Аджигайтканова («Аджигайтканова С.С.» КФХ), Куьнбатардан Фазиль Мансуров («Мансуров Ф.» КФХ) бийдайдынъ килограммын 12 маьнеттен сатттылар.
Район ветеринар управлениесининъ куллыкшысы Каирбек Рахмедов ярмаркага сатылмага аькелинген эттинъ сапатын тергеген.
Авыл яшавшыларынынъ соьзине коьре, бу ярмалыкта фермер эм байыр ярдамшы хозяйстволарынынъ, арендаторлардынъ хыйлысы катнаспага, солай ок халк та тоьмен бааларына туьрли эм керекли авылхозяйстволык товарларын сатып алмага болаяк эди. Болса да бу маьнели эм яшавшылар уьшин пайдалы шарады бир неше куьнлер эртерек юритип, ерли баспа органында эм радиодан билдируьв этпеге керек эди деп белгиледилер Терекли-Мектеб авыл яшавшылары.
Бизим хабаршы.
Суьвретте: ярмаркадан коьринис.