Аьлиги заманда аьдемлер арасында байланыслар туьрли деп бираз оькиниш пен айтамыз. Баягы заманлардагыдай болып, азбарда этилинетаган куллыклар эл мен бирге этилинмейди, болса да, бар сондай аьдемлер, олар биринши шакырув ман коьмекке келедилер.

«Шоьл тавысы» республикалык газетасынынъ меканында ярастырув куллыклар этилинди деп суьйинип турамыз. Коьплеген йыллардан бери турган мекан буьгуьнлерде янъыдан курылгандай коьринеди. Коьплеген куллыклар редакциядынъ азбарында да этилинип туры, кайзаманда курыган тереклер пышылды. Соны ман байланыста редакциядынъ коллективи Эльмира Юнус кызы Кожаевадынъ етекшилеви астында тереклер пышувга оьз коьмегин эткен «село Терекли-Мектеб» СП МО аькимбасы Зейдулла Курманович Аджибайрамовка, Россия Федерациясынынъ Ногай районы бойынша иш ислер боьлигининъ етекшиси Наиб Тюлеген увылы Каракаевке, тыл боьлигининъ етекшиси Алик Эльгайтар увылы Кургановка, боьлик прапорщиклери Ибрагим Юнус увылы Койлубаевке, Рахмет Мурзабий увылы Нурлубаевке, ОБППСП стажерлары Арсланбек Равшанбек увылы Елакаевке, Айнадин Абдулманап увылы Адиевке, Арслан Хаирхан увылы Имангишиевке уьйкен савбол айтады.
Куллыктан кажынмай, оьз заманын бос йибердим деген ойга келмей, олар сав куьн ислеп, бизге уьйкен ис эттилер. Тыныш тувыл исинде йигитлерге уьстинлик йораймыз. Эткен куллыгынъыз аьр заманда да аклансын. Сизге йогарыда таза аспан йораймыз.
«Шоьл тавысы» республикалык газетасынынъ коллективи.