Тамбыз айынынъ 24-нши куьнинде II Савлайногайлардынъ сабантойы – «Ногай Эл» фольклор эм аьдетли маданият фестивали оьтеек. Байрам шаралар Дагестан Республикасынынъ Ногай районынынъ Терекли-Мектеб авылындагы Ф.Капельгородский паркында эртенги 10 саьатте басланаяк. Сабантой Россиядынъ Миллет ислери бойынша агентствосынынъ эм Россия ногайларынынъ ФНКА уйгынлавы ман ДР Ногай район администрациясынынъ коьтергишлеви мен озгарылаяк. Сабантойдынъ программасы ман сизди эртеректен таныстырамыз. Фестивальдинъ шатлыклы ашылувыннан сонъ, байрам концерти оьтеек. Оннан сонъ «Ай, Айданак» биюв-ойын программасы ман Ногай патшалык «Айланай» фольклор этнографиялык ансамблининъ катнасувшылары йыйылганлар алдына шыгаяклар. Солай ок ногай аукционы да озгарылаяк. Байрамда конаклар эм район яшавшылары, туьрли миллет базласларда катнасып, оьз куьшлерин сынамага болаяклар. Айтпага, яслар уьшин капталлар ман куьрес, табантирес, ок атув, аркан тартысув уйгынланаяк. Тагы да йыйылган яслардынъ курыкка минип савга алмага да амалы болаяк. Сабантойда кызлар уьшин де «Сувды тоьгип койма» деген конкурсы озгарылаяк. Спорт базласлардан оьзге, фестивальде саният конкурслар да оьтеек – домбырада ойнав, ногай миллет биювин биюв. Яслар ман уьйкенлер шатраш ойынын ойнамага шакырылаяклар, солай ок футбол турнири де озаяк. Ногайымыздынъ алды, йолды алган Сабантойында ортакшалык этпеге шакырамыз.
Н.Кожаева.