Бу айдынъ басында «Единая Россия» партиясынынъ Дагестан регионаллык боьлигининъ XXXIII конференциясынынъ экинши кезеги болып оьткен.

Соны партиядынъ регионаллык боьлигининъ секретари, ДР Аькимбасынынъ куллыгын кесек заманга юритуьвши Сергей Меликов ашкан эм юриткен.
Конференцияда РФ Государстволык Думасынынъ депутатларына кандидатлар, ДР Сайлав Комиссиясынынъ, ДР бойынша РФ Минюстининъ Управлениесининъ ваькиллери, партиядынъ ерли боьликлериннен сайланган делегатлар катнастылар.
Конференцияда ортак бир республикалык сайлав округы бойынша коьрсетилинген сегизинши кере шакыртылаяк ДР Халк Йыйынына депутатларга кандидатлардынъ сырасы белгиленди. Партия делегатлары ясыртын тавыслав йорыгы ман соны бир тавыстан беркиттилер. Соны беркитуьв уьшин шарада катнаскан баьри 250 делегатлар да тавыслаганлар.
Кандидатлар сырасын болаяк сайлавларда Дагестан Республикасынынъ Аькимбасынынъ куллыгын кесек заманга юритуьвши Сергей Меликов басшылаган. Списоктынъ ортак республикалык кесеги бойынша кандидатлар сырасына, регион етекшисиннен оьзгелей, сенатор Сулейман Керимов эм РФ Государстволык Думасынынъ депутаты Заур Аскендеров киргистилгенлер.
Конференциядынъ тамамында аьдетке коьре шатлыклы аьлде партиядынъ янъы агзаларына билетлер тапшырылды.
Конференция куллыгын тамамлай келип, Сергей Меликов янъыртылган сырасында партиядынъ регионаллык политикалык советининъ президиумынынъ йыйынын оьткерген.