Космонавтика куьни Россиядагындай болып, 12-нши апрельде дуныядынъ 75 элинде белгиленеди. Уьстимиздеги 2021-нши йыл космоска аьдемнинъ биринши ушувына 60 йыл толады. 1961-нши йылдынъ 12-нши апрелинде Юрий Алексеевич Гагарин энъ де биринши болып космоска ушкан, сол аьдемликтинъ тарихинде энъ де маьнели оьзгерис болып калган. Аьдемнинъ космоска биринши ушувы савлай дуныядынъ эсин караткан.

Аьдем космоска ушар уьшин С.Королевтынъ етекшилиги астында инженерлер командасы «Восток» сериялы космос корабльлерининъ конструкциясын туьзгенлер. С.Королев ушувдынъ етекшиси этип беркитилген болган. Космонавтлардынъ аьзирленуьви 2 йыл узагына барган.
Бортында летчик тамада лейтенант Юрий Гагарин болган «Восток-1» корабли, Байконур космодромыннан 1961-нши йылдынъ коькек айынынъ 12-нши куьнинде эртенги 9 саьат 7 такыйкада йол алган. Ю.Гагарин ушкан 108 такыйка ишинде планетады бир кере айланып шыккан. Бу айтылган ушувдан сонъ 1962-нши йылда СССР-да янъы байрам беркитилген.