Ногай районымызда Россия Федерациясынынъ Конституциясына туьрленислер киритуьв бойынша озган ортакроссиялык сайлавлардынъ тамамы келтирилди. Ногай район ТИК председатели Алимакка Ганиевтинъ билдируьвине коьре, район яшавшыларынынъ коьбиси РФ Конституциясына туьрленислер киритуьв уьшин тавысларын бердилер. Ортакроссиялык тавыс беруьв болжалы оьткеннен сонъ, Ногай район Хатын-кызлар союзынынъ председатели Асият Манкаева оьз ойы ман боьлиседи: «Ногай районынынъ коьбиси хатынлары оьзлерининъ тавысларын туьрленислер уьшин бердилер.

Биз сол Россия Конституциясын оьзимиздинъ коьп миллетли элимиздинъ яркын яшавы уьшин кабыл этип аламыз. Сайлавларда ортакшылык эткен аьр бир аьдем оьзининъ балаларынынъ эм аьелининъ келеектегисин ойлаган. Аьел аьр бир ямагаттынъ басланувы болады. Сол ямагаттан халк туьзиледи, патшалык болады. Солай ок, сайлавлар озган шакта, тавыслав юретаган участокларда карав юриткен Хатын-кызлар советининъ агзаларына оьз разылыгымды билдиремен, – дейди Асият Манкаева.

Сол сайлав участокларда карав юриткен хатынлардынъ соьзлерине коьре, бу йылгы тавыслав йогары дережеде оьтти.

Эсинъизге салып озайык, уьстимиздеги йылдынъ июнь айынынъ 25-нши куьниннен алып, июль айынынъ биринши куьни бойынша савлай элимиз бойынша РФ Конституциясына туьрленислер киргистуьв бойынша тавыслав оздылар. Тавыславдынъ сол шаклы куьн узагында озгарылувы дуныя ман бир болып яйылатаган коронавируслы инфекция ман байланыслы болды. Тавыслав озгарылатаган баьри участокларда да аьдемлердинъ кавыфсызлыгы канагатланды.

РФ ЦИК билдиргенлей, июль айынынъ 2-нши куьнине тавыславда катнасканлардынъ 77, 92 проценти РФ Конституциясына туьрленислер уьшин тавысларын бергенлер, оларга карсы 21, 27 процент шыккан. Савлай элимиз бойынша сайлавларда 65 процент яшавшылар ортакшылык эттилер.

Дагестан Республикасынынъ избиркомынынъ билдируьвлерине коьре, республикамыз бойынша тавыславда 89, 99 процент яшавшылар ортакшылык эттилер. Сол саннан – 1352732 аьдемлер яде 89,19 проценти Россия Федерациясынынъ Конституциясына туьрленислер киргистуьв уьшин тавысларын бергенлер, карсылыгын 155290 яде 10, 24 процент коьрсетти.

Савлай тавыслав оьткен болжал ишинде Дагестан Республикамыздынъ сайлавлар комиссиясына тийисли йорыклар бузылув акында бир билдируьв де туьспеди.