2-нши июльде Ногай район администрациясында муниципалитет аькимбасы Джамалутдин Эсиргеповтынъ етекшилиги мен кенъес озгарылды. Онынъ исинде авыл поселениелер аькимбаслары, республикалык эм район организациялар етекшилери, ямагат организациялар ваькиллери ортакшылык эттилер. Йыйылганлар алдында муниципалитеттинъ Билимлендируьв боьлигининъ етекшиси Алтын Агаспарова ЕГЭ эм ОГЭ сынавларын оьткеруьвдинъ сырагылары акында эм авыл хозяйство управлениесининъ ваькили Яхъя Караев районнынъ авыл хозяйстволык эгинлеринде шекертки мен куьрес юритуьв бойынша аьл акында эсап бердилер.

А.Агаспарова Ногай районында ЕГЭ-22 сынавлары йогары дережеде оьткенин белгиледи. Онынъ айтувы ман, ЕГЭ сынавлар оьтуьвдинъ бас кезегинде ортакшылык этуьвге 105 аьдем регистрацияланган, муниципалитеттинъ билимлендируьв организациялары ман 2021-2022-нши окув йылында педсоветтинъ карарлары ман «Окувда айырым уьстинликлери уьшин» деген медаль алувга 17 аьдем коьрсетилген, олардынъ 13-и сол медаль иелери болдылар. Район аькимбасы Д. Эсиргепов, алдынгысы мектеб директоры, сондай маьнели шарады озгарувдынъ йогары уйгынланганын белгиледи. – Районымыздынъ, республикадынъ эм савлай элимиздинъ оьрленуьвининъ бас негизи – ол бизим балалардынъ билимлери, олардынъ келеектегиси. Сынавлардынъ йогары дережеде оьтуьви районнынъ да байлыгы, уьстинлиги, бизим оьктемлигимиз болады. Билимлендируьв тармагына, баьри педколлективлерге оьз разылыгымды билдиремен, – деп белгиледи Д.Эсиргепов. Сонъ йыйылганлар алдында шегертки зыяншылар ман куьрес юритилуьв бойынша аьл акында Я.Караев билдирди. – Шегертки зыяншылар ман куьрес «Танрек» препараты ярдамы ман 730 гектар эгинлерде юритилген. Ызгы 10 куьнлердеги явын-шашын аьллери бу исти юритпеге эп бермеди. Аьллер ийгиленсе ок, баьри майданда да куллык юритилеек. Баьриси бу куьнге майданлардынъ 1370 га ери шегерткиден тазалавга деп уйгынланган. Белгилеп озайым, кызыксынган ведомстволар эм организациялар ваькиллери йок эди, а олар ыхтыяр бермесе, биз бу шарады озгарып болмаймыз. Россельхозцентр специалистлери болмага тийисли эдилер, – деп беркитти Я.Караев. Муниципалитет аькимбасы УСХ специалистлерге бу яктан исти куьшлендирмеге эм, амалга коьре, шегертки бар баьри майданларды да тазалавга эс каратпага керегин белгиледи. Белгилев керек, препарат баасынынъ 50% авыл хозяйстволык товарлар болдырувшылар оьз амаллар эсабыннан тоьлейдилер, а калган 50% район администрация эсабыннан тоьленеди. Солай ок кенъесте Ногай ЦРБ бас врачы Фаризат Межитова муниципалитет еринде коронавирус бойынша аьл акында билдирди. Онынъ соьзлерине коьре, район больницасында коронавирус авырувлылар йок. Д.Эсиргепов коронавирус яйылувы ман куьрес юритуьв бойынша куьнде де анализ алмага кереклигин белгиледи, неге десе республикада, оькинишке, бу вирус оьшигип басланганы белгиленеди. Кенъесте район аькимбасы 10 орынга эсапланып Кумлы авылында мектеб курылысынынъ проекти технический экспертизасын оьткени акында, солай ок тез арада «Индустриальный парк «Ногайпром» еринде эки завод (юн эм тери юватаган) курылаягын билдирди. Ол бизим районды 70 ис орынлар ман канагатлаяк. Яшавшылар да юнди пайдалы баа ман бермеге болаяклар. Район аькимбасы баьри йыйылганларга оьз ис орынларында нызам тутувды беркитуьвге эс каратпага керегин белгиледи.

Э. Кожаева