Янъыларда, Кизляр каласынынъ П.Багратион атындагы краевед музейинде – бу республика бойынша Дагестаннынъ А.Тахо-Годи атындагы музейининъ энъ де уьйкен музейи болады, ногай халкымыздынъ талаплы суьвретшилерининъ бириси, Сраждин Батыров атындагы мектебининъ окытувшысы Мархаба Аджибатыр кызы Шалиевадынъ Ногай район тысында биринши суьвретлер выставкасы уйгынлы оьтти.
Автордынъ яркын бояклар ман ясалган суьвретлери П.Багратион атындагы музейдинъ бир боьлмесининъ тамында ерлестирилди. Онынъ аьр бир суьврети коьзди кувандырады, коьнъилинъди коьтереди.
Оьнерли суьвретшимиздинъ суьвретлер выставкасын П.Багратион атындагы музейининъ етекшиси Любовь Александровна Мстиславская ашты эм юритти. Ол биринши соьзди Ногай районыннан конак болып барган «село Терекли-Мектеб» СП МО администрациясынынъ аькимбасы, «Ногай Эл» РННКА-дынъ етекшиси Зейдулла Курман увылы Аджибайрамовка берди. Зейдулла Аджибайрамов Мархаба Шалиевады ак юректен ашылган выставкасы ман кутлап, алдыда уьстинликлер йорады. Онынъ суьвретлеринде ярыклык эм толы коьнъиллик бары акында айтып кетти эм РННКА атыннан разылык хат пан гуьл байламын тапшырды. Солай ок, ол бу выставкады уйгынлавга оьзининъ аз куьшин салмаган А.Тахо-Годи атындагы музейининъ Ногай район ериндеги филиалынынъ етекшиси Каирбек Бальгишиевти эм Кизляр каласындагы П.Багратион атындагы музейининъ етекшиси Любовь Мстиславскаяды да разылык хатлар ман савгалады. Зейдулла Курман увылы Аджибайрамовтынъ соьзин бардырды онынъ ис йолдасы, Кизляр районы бойынша регионаллык «Ногай Эл» ногай миллет автономиясынынъ председатели Изидин Бигишиев.
Выставка Кизляр каласынынъ яшавшыларына бек пайдалы болып, олардынъ назарларын каратаягы акында «Город Кизляр» кала округынынъ администрациясынынъ социаллык оьрленуьв бойынша боьлик етекшиси Анна Георгиевна Чернышова айтып кетти. Ол оьз соьзинде Кизляр эм Ногай район музейлери арасындагы дослыктынъ куьннен-куьнге беркуьви акында да токталды. Бу дослыктынъ емислери бизге де коьринеди.
Выставкадынъ ашылувында «Ногайский район» МР администрациясындагы Хатын-кызлар советининъ председатели Асият Манкаева да ортакшылык этти. Ол болса, бу куьнлерде талаплы суьвретши Мархаба Шалиевадынъ эткен ислери мен оьктемсийтаганын билдирип кетти.
– Биз Мархабадынъ суьвретлерин карап суьйинемиз, соларда бизим халкымыздынъ ярык маданияты эм яшавы, – деди ол.
Талаплы суьвретшидинъ выставкасында, Ногай районыннан барган конаклардан баска болып, Кизляр каласында яшайтаган эм туьрли ерлерде ис аьрекетин бардыратаган ногай миллетли аьдемлер болып, коьлем коьнъиллик таптылар. Сол санда Кизляр каласынынъ мектеблерининъ эм окув ошакларынынъ окытувшылары С.Таипова, Н.Абдуллаева, У.Аманакаева, М.Караянова, Х.Таниева, Э.Хасмедова, студентлер мен аьрекет бойынша етекшидинъ орынбасары Н.Куликова, КППК окытувшысы эм китапхана куллыкшысы А.Аюпова эм баскалар бар эдилер.
Автордынъ ярасык суьвретлери акында, оларга баады П.Багратион атындагы музейининъ суьвретшиси, илми куллыкшысы Захар Дауд увылы Азизов берди. Оны тек йыйылган конаклар тувыл, суьвретлерге карамага келген студентлер де уьйкен кызыксынув ман тынъладылар.
– Мен Мархаба Шалиева ман танысканым да коьп тувыл, бизим музейде онынъ выставкасы болады дегенде биринши кере коьрдим. Суьвретлери коьзге туьседи, аьр бирисинде бир ой эм ниет, солар аьр бир караган аьдемге ювык, – деди ол.
Выставкага келген конаклардынъ аьр бириси суьвретшиге оьз йоравын айтып болганнан сонъ, Мархабадынъ оьзине соьз берилди. Ол студентлерге, конакларга оьз суьвретлери акында хабарлады. Кайсы суьврет кайтип тувганы акында билдирди. Ким биледи, оьз хабарлавы ман ол яслардынъ келеектегисине йол салган болса да, неге десе оны тынълаган студентлердинъ биреви ога янасып, ногай миллетли авылдаслары, атайларынынъ бириси кеспили суьвретши болганы акында айтып, оьз суьвретлерин язып басламага токтасканын билдирди.
Суьвретлер бойынша яслар Мархаба Шалиевага оьзлерин кызыксындыратаган соравларын берип, маслагатларын да алдылар.
Оьнерли суьвретши Мархаба Аджибатыр кызы Шалиевадынъ Ногай районынынъ тысында биринши выставкасынынъ ашылувы йогары дережеде уйгынланган эди. Энди эки ай узагында Кизляр каласынынъ П.Багратион атындагы музейинде онынъ суьвретлери коьзди кувантып тураяклар. Мырады барлар Кизляр каласынынъ П.Багратион атындагы музейине бармага эм Мархабадынъ суьвретлерине карамага боладылар. Сол выставкада болган мен, йогары коьнъил мен кайттым, онынъ суьвретлеринде яркын яшав эм миллетимиздинъ маданияты.
Г.Сагиндикова.
Суьвретлерде: выставка ашылган шакта.
