Ногай районынынъ уьйкен авылларынынъ бириси – Кумлыда мине коьп йыллардан бери конаксуьер Мамуровлардынь аьели яшав суьрип келеди.
Уьй иеси Шора-акайды авылда дин аьрекетшиси деп таныйдылар. Ол коьп йыллар артта Ленин атындагы, Имунный совхозларында, «Кумлинский» колхозында уьстинликли куллыкшыларынынъ бириси болып келген, кесек заман ерли мектебинде шатраш бойынша кружогын да етекшилеген. Уьй бийкеси Тансык Кусеповна мине коьп йыллардан бери авыл мектебинде баслангыш классларынынъ сулыплы окытувшыларынынъ бириси болады. Асылы ман Кумлы авылыннан Тансык Кусеповнады ерли мектебте 9 классты окып тамамлап, окытувшы болаякпан деген мырады Н.Крупская атындагы педучилищесине аькелди.
1967-нши йыл кыскаяклыдынь атасы Кусеп каты авырувдан сонъ дуныядан кешеди. Асыл анайга колында калган бес кызын эм бир увылын асырап, аякка салмага керек эди. Кыйын болса да, Асыл-анай баьри балаларына да билим алдырмага куьш тапты. Кызлары – биреви бухгалтер, экиншиси – кийим тигуьвши, баскасы туькенши болып, аьр кайсысы да оьз кесписи бойынша куллык этип келдилер. Аьвлетлери уьшин сав куьшин багыслаган, оларды аякка турсын деп, аз кыйын салмаган анасын олар буьгуьнлерде юрек йылувлык пан эскередилер. Тансык Кусеповнадынъ эскеруьвлери бойынша, Асыл-анай баьри аьвлетлерининъ де аьел курганын, уныкларынынъ тувганларын да коьрди, оларды бавырына да басып, аьр кимининъ етимиси мен куьезленип келди.
Яс кыз педучилищеди тамамлаган сонъ, кесписи бойынша ерли мектебте куллык этип баслайды.1972- нши йыл бирге окыган тенъи Шора Курман увылы ман бактысын байлап, аьел курадылар. Эки ястынь курган аьелинде 4 йигитлери: Эрадиль, Рустам, Бийислам эм Ислам увыллары тувып, асыл боладылар. Буьгуьнлерде олардынъ аьр кайсысы оьз аьеллерин курып, балалы-шагалы болып, Норильск каласында яшайдылар.
Буьгуьнлерде окытувшы кыскаяклы яшавынынъ 51 йылын яс несилди билимлендируьвге багыслап келеди. 1998-нши йылдан алып 2003-нши йылга дейим ол авыл яшавшыларынынъ сайлавы ман ерли администрациясын да етекшилеп келди. Кыскаяклыдынъ бирге куллык эткен ис йолдаслары, авыл яшавшылары арасында сый- абырайы уьйкен. Ол буьгуьнлерге дейим де авылдынъ ямагат яшавында белсенли катнасып келеди. Ясуьйкенге сый этип, керек ерде ясы кишкей мен оьз ой-маслагаты ман боьлисип, суьйген иси мен тоьгеректегилерге коьрим болып, дайым туврашылыкты, аьдилликти яклап келген аьдем болады.
Онынъ элли йылдан артык халкын билимлендируьвге багыслаган ис аьрекети эли мен билинмей калмады. 2015-нши йыл ол «Россия Федерациясынынъ халк билимлендируьвининъ отличниги» деген сыйлы атына тийисли этилди. Онынъ билимлендируьв тармагында коьрсеткен етимислери коьплеген Сый грамоталары, Разылык хатлары ман белгиленгенлер.
Сулыплы окытувшы он выпусклерин яшавдынь кень йолына онълаган. Окытувшыдынъ колында билим алган окувшылар буьгуьнлерде туьрли тармакларда етимисли куллык этип, элине, халкына оьз пайдасын тийдирип келедилер: айтпага, Зейдулла Аджибайрамов, Насипли Суюндикова, Эльмира Кожаева, Альмира Арсланова, Асиет Саитова, Увылбике Шандавова, Фарида Менлиалиева эм сондай баскалар. Окытувшы олардынъ акында уьйкен сый эм оьктемлик пен эсине туьсиреди.
«Онъганнынъ эки яхшылыгы бир келер» дегенлей, Мамуровлардынъ аьелинде де эки яхшылык бир косылып келди. Аьел курылганына 50 йыл – алтын тойы ман уьй бийкесининь 70 йыллык мерекеси бирге келди.
Буьгуьнлерде Шора-акай ман Тансык-абай алтын тойын эм сыйлы мерекесин 13 уныкларынынъ эм 2 немерелерининъ тоьгерегинде хош аладылар.
Эмир, Сайлав, Зухра, Надир, Амир, Закир эм баска уныкларынынъ окувдагы, яшавдагы етимислери акында тетелери коьзинде уьйкен суьйиниш пен хабарлайды. Аталары болса, уныклары уьйге келгенде, оларга кобыз, домбыра саз алатларында, шатраш ойынын ойнап уьйретпеге шалысады. Сол азбар дайым балалардынъ куьлкисине, ойынларына толган. Сол тувылма аьдем, аьел уьшин наьсип дегенинъ!
Сол аьел курылганлы 50 йыл толып, алтын тойын байрамшылавы ман эм Тансык Кусеповнады сыйлы мерекеси мен ак юректен кутлайман. Берк ден савлык, узак оьмирди, ис аьрекетинде йогары етимислерди, аьел онъайлыгын, коьп яхшылыклар сагынаман.
Г.Нурдинова.
Суьвретте: Мамуровлардынъ аьели.
