Ногай районы бойынша Россия МВД боьлигининъ куллыкшылары, аьр юма сонъгы куьнинде шыгып, район орталыгынынъ тоьгерегин йыйнавды ийги аьдет этип алдылар.

Оьткен юмадынъ тыншаюв куьнлеринде де ыхтыяр саклавшы органлардынъ куллыкшылары район орталыгынынъ туьрли майданларын кокыстан тазаладылар. Олардынъ куьши мен Терекли-Мектебтинъ парк зонасында ерлескен, алдынгы поликлиника болган меканынынъ да япсарлары йыйналды.
Ногай районы бойынша Россия МВД боьлигининъ етекшиси Наиб Каракаевтинъ билдируьвине коьре, ыхтыяр саклавшы органларынынъ куллыкшылары энди де армаганда сол ийги аьдетти бардыраяклар.
– Бизим куллыкшылардынъ юма сайынлык йыйнавы да бизим районымызга аз болады. Биз йыйнасак та, Ногай районынынъ санитар-эпидемиологиялык аьли ийги аьлде тувыл, яраяк дегенге де етпейди, – дейди Наиб Тоьлеген увылы. Онынъ соьзине коьре, куьннен-куьнге коьбеетаган кокыслар ел заманларда шоьл мен, авыл-авылдан ушып юреди, сол зат бизим экологияды да бузады.
«Тазалык йыйнаган ерде тувыл, батырмаган ерде», – деп те халк айтувы босына айтылмагандыр.