Аьел – патшалыктынъ бир кесеги. Сонынъ уьшин де, аьеллер не шаклы берк, татым, ишки дуныялары бай, оьнер ягыннан оьркенли, ийгиликке ымтылувы ырызгылы болса, сол шаклы да патшалык онъган деп, куватлы деп саналады.
Бизим Терекли-Мектебте сондай, «мен-мен» деп коькирекке урмай, оьзлерининъ куьндегилик ислерин этип, оьз аьели, оькимети алдында борышларын намыслы кепте толтырып туратаган аьел яшайды. Ама сонда да бу аьелдинъ агзалары оьзлерининъ бас деп оьнер усталыклары ман, сонъ кайсы яктан да коьримли яшавы ман савлай Россияга танылдылар. Газетамыздынъ сыйлы окувшылары, сизинъ шыдамынъызды коьп сынап олтырмай, сол аьел ким экенин айтайым – Залимхан эм Бурлиянт Колебаевлер.
Аьелдинъ басы Залимхан Мурзагельди улы патшалык фольклор-этнографиялык «Айланай» ансамблинде куллык этеди, оьзининъ оьнери мен халкын сукландырады. Аьелдинъ бийкеси – Бурлиянт Муратали кызы бу куьнлерде оькимет беретаган декрет ял алувда болып, балаларды тербиялав деген хайырлы ис пен, аьелде ийги коьнъилли аьл туьзуьви мен каьр шегеди.
Эндиги бу татым, наьсипли, доьрт саьбий тербияланатаган коьп балалы аьелдинъ яшавында болган куванышлы оьзгерис акында айтып билдирейим. Басын айтпаса – ызы келмейди.
Терекли-Мектебте озган концертлерде занъыравлы тавысы ман, сахнада оьзин шынты артисттей болып, ыспай юритип йырлайтаган кишкей кыз – Роза Колебаевага коьплер эс эткен боларлар. Кыздынъ йырлавына эс этпей де болмаяк, коьнъилге етеди.
Район оьлшеминде болган конкурста Залимхан Колебаев кызы Роза ман йырлайды. Олардынъ йырлавына эс этедилер эм Махачкалага «Меним аьелим – меним Россиям» деген конкурста катнаспага шакырдылар. Соьйтип, бу аьелдинъ, онынъ оьнерли агзалары акында патшалыгымыздынъ бас каласы Москвага да хабар етеди.
Янъыларда Залимхан эм Бурлиянт Колебаевлердинъ аьелине суьйинишли билдируьв келди: олар «Меним аьелим – меним Россиям» деген шакырув астында озатаган «Йыл аьели-2019» деген Савлайроссиялык конкурста «Аьдетлерди саклавшы аьел» номинациясында енъуьвши болып шыкканлар. Сонынъ аркасында бу аьел «Йыл аьели-2019» деген Савлайроссиялык конкурстынъ катнасувшылары деген китабине киргенлер. Китапке Колебаевлердинъ аьелининъ суьврети салынган, эм аьел агзалары – Залимхан Мурзагельди улы, Бурлиянт Муратали кызы, Роза (7 яс), Султан (4 яс), Ясмина (2 яс), Милана (6 ай) атлы-аты ман язылганлар. Бу ерде аьелдинъ ясуьйкенлери Мурзагельди эм Насипхан Колебаевларды белгилейим деп ойлайман, неге десе олар да аьелдинъ оьрленуьвине оьз уьлислерин косканлар эм бу куьнлерде бу ийгиликке суьйинедилер.
«Йыл аьели» деген конкурс доьртинши йыл озгарылады эм аьр дайым Россиядынъ аьр бир республикасында, аьр бир областинде аьеллер хош коьрип, суьйип ортакшылык этедилер, неге десе яркын, талантлы, ис суьер, миллет эм аьел аьдетлерди аявлап саклайтаган аьеллер аркасында дуныя онъаягы аян болады.
Магомет Кожаев.
Суьвретте: Колебаевлердинъ аьели.
