Быйыл март айында КПРФ Ногай район боьлиги туьзилгенли 30 йыл толды.
1992-нши йылдынъ 7-нши мартында Ногай районында алдынгы Россия Президенти Борис Ельциннинъ КПСС-тынъ аьрекетин токтатув акында шыгарган указларыннан сонъ, алдынгы КПСС агзаларынынъ биринши уйгынлав-токтастырув йыйыны болып озган. Сол йыйында партия органы эм Дагестан кыйыншылар партиясынынъ 1-нши курылтайына делегатлар сайланды. Сонъында бу партия Дагестан коммунистлер партиясына, оннан сонъ 1993-нши йылдынъ 13-14-нши февралинде оьткен КПРФ-тынъ 2-нши бирлестируьв-кайтадан туьзуьв курылтайынынъ карарларыннан сонъ, РФ Коммунистлер партиясынынъ Дагестан республикалык боьлигининъ структуралык боьликлерининъ бирисине айланган. Сол курылтайда бу сыдыралардынъ авторы да катнаскан.
КПРФ Ногай район организациясы Россия Компартиясынынъ янъы тарихинде партиядынъ Дагестан республикалык боьлигининъ алдышы эм белсенли организацияларынынъ бириси болып келеди.
Ызгы 30 йыллар ишинде туьрли ямагат-политикалык шараларында катнаса келип биз, айтпага, 1997-нши йылда Дагестанда бириншилерден болып, Ногай район аькимбасын сайлавларда ортакшылык этип, енъуьвге етискенмиз. 2007-нши йылдан аьлиги заманга дейим КПРФ Ногай район боьлигининъ Дагестан Республикасынынъ Халк Йыйынынынъ коммунистлер фракциясында оьз ваькили бар, ол соны ман бирге партиядынъ республикалык боьлигининъ етекшилерининъ бириси де болып саналады.
2010-ншы йылда район коммунистлери атыннан депутатларга кандидатлар ерли сайлавларда енъип, Ногай район Депутатлар йыйынынынъ 40 процент мандатларын алганлар. Аьлиги заманда да КПРФ Ногай ерли боьлигининъ авыл эм район Депутатлар йыйынларында, районнынъ айырым толтырувшы органларында эм ямагат организацияларында оьз ваькиллери бар.
Куьн сайынлык уйгынлав-политикалык аьрекетининъ маьнели ягы деп КПРФ Ногай район комитети яшавшыларда, боьтен де яс-явка арасында район кыйыншылары, совет заманындагы согыс эм ис ветеранлары акында эстеликли эскеруьвлерди саклав бойынша куллык юритуьвди санайды. Соны ман байланыста ис ветеранларына йыл сайын да партия райкомынынъ, республика парламентининъ депутатынынъ аьрекети мен онлаган Разылык хатлары ман Сый грамоталары тапшырылады. Олардынъ айырым биревлери, КПРФ ягын тутканлар, эстеликли медальлер мен савгаланадылар.
Буьгуьнлерде район комитети «СССР туьзилгенли 100 йыл», «Ленин пионериясы курылганлы 100 йыл», «КПРФ Ногай район организациясы туьзилгенли 30 йыл» деген шакырувлар астында сол уллы оьзгерислер мен байланыслы шараларды оьткеруьвге аьзирлик коьреди.
Партиядынъ район комитетининъ аьрекети мен алдынгы йылларда да эм эндиги де окувшылар арасында футбол, волейбол, шахмат ойынлары бойынша спорт ярыслары оьткериледи. Ызгы йылларда КПРФ Ногай райкомынынъ кубогы уьшин киши-футбол ойыны бойынша турнир озгарылады. Сонда районымыздан 10-ннан артык командалар, Кизляр, Тарумов районларынынъ, Кизляр каладынъ, конъысы Ставрополь крайынынъ яс спортсменлери катнасадылар.
Биз, КПРФ Ногай район боьлигининъ коммунистлери, отыз йылдан бери оьз ягымызды тутувшылар эм союзниклеримиз бен бирге районымызда РФ Коммунистлер партиясынынъ программасын яшавга шыгарув бойынша уйгынлав-политикалык куллыгымызды армаган бардырамыз.
М.Авезов,
КПРФ Дагестан республикалык боьлигининъ секретари, КПРФ Ногай РК 1-нши секретари, ДР Халк Йыйынынынъ депутаты.
Суьвретте: КПРФ Ногай район комитетининъ агзалары.
