Мага 1994-нши йылда Карашай-Шеркеш Патшалык педагогикалык университетининъ журналистика боьлигинде окув йылларымда практика оьтпеге деген борыш бойынша «Шоьл тавысы» газетасынынъ редакциясына йол алмага туьсти. Сол практикамды экинши курста оьтуьвимде мага газетадынъ редакторы Магомед Кожаевтинъ етекшилиги мен ис коллективи мен танысып, университетте алган билимди исте кулланып, газета тармагында куллык этпеге кеспили куллыкшыларынынъ бай сулыпларына уьйренмеге туьсти.
Сол заман практикам бек кызыклы оьткени эсимде. Мага редакциядынъ куллыкшылары газетадынъ аьзирленуьви, онынъ кайтип кепленуьви, макалалардынъ кайтип йыйналувы акында коьп сыхырлары ман боьлистилер. Оьзим де бир неше макалалар юрип язганым, язган ятлавларым да сол практика айдынъ ишинде газетада баспаланганы тек туьнегуьндей эсимде турады. Сол заманды эсиме туьсируьвим де босына тувыл, редакциядынъ ис коллективининъ ишинде мени бириншилерден хош коьрип алганлардынъ, кайсы билгенин де уьйретип, оьзининъ уьйкен аьдемшилиги мен баскаланган, танъ, таза ниетли, оьзининъ исин юреги мен суьйген, кайсы тапшырылган борышын да яваплы толтырмага шалыскан кыскаяклы акында эскерип кетким келеди.
Ак, ашык шырайлы, ярасык юзли, толы коьнъилли, юка сесли кыскаяклы кайсы келген практикантшылардынъ да, редакцияга оьз куллыгы ман келген аьдемлердинъ тилегин де, соравын да бир де явапсыз калдырмаган болар. Ол аьр кимнинъ де коьнъилине етпеге шалысады. Азинет Башиева мине 40 йыллар бойы «Шоьл тавысы» газетасында корректорлык аьрекетин сапатлы дережеде толтырып келеди. Оны ман мага 2003- нши йылдан алып, окувымды тамамлаган сонъ, бир коллективте де куллык этпеге бакты буйырды.
Оьз исине алал кыскаяклы яшавын газета ман 1980-нши йылдан алып байлап келеди. Оннан алдын ол ис йолын Махачкаладагы ногай радиоберуьвинде диктор аьрекетин толтырувы ман баслаган. Ол бизге, ис йолдасларына, биринши тувра эфиринде ногайша соьйлегенин йыйы эсине туьсирип хабарлайды. Ногай радиосында биринши диктор болганы уьшин онынъ аты Кызыл китабине де киргистилген. Газетадынъ кепленуьвинде ол газетады болган янъылыслардан окып тазалайды, окувшыга аьзирлеп береди.
Ис аьрекети бойынша Азинет Утей кызына ис ветеранлары С.Рахмедов, М.Авезов, М.Отаров, М.Кожаев, М.Курбанова, К. Елакаева, Т.Аблезова, М.Рахмедова ман, Э.Сатыров пан эм сондай баскалар ман куллык этип, олардынъ бай сулыбыннан уьйренмеге, олардан коьрим алып, ясларга да уьлги болмага шалысып келген. Ол куллык этип баслаган заманларда газета линотип машинкалар ман шыгарылатаган заманлар эди. Буьгуьнлерде сол машинкаларын янъы компьютерлик техникасы авыстырады. Кайдай кыйын заманлар болган болса да, Азинет-абай оларды коьзлеринде йылувлык пан эсине туьсиреди.
Газетадынъ аьр бир номери Азинет-абайдынъ колынынъ астыннан янъылыс йиберилмей, сапатлы аьлде шыгаягына онынъ аьр кайсы ис йолдасы да сенедилер, сол сенимди ол йойытпай, яваплы ис куллыкшысы деген ат пан аклап келеди. Онынъ аты да сол ис ветеранлары ман бирге редакциядынъ бай тарихинде ыз калдыраягына соьз йок. Ис коллективте ол ис суьерлиги мен, куллыгында йогары яваплылыгы ман сый да, абырай да казанган. Ис аьрекетинде коьрсеткен етимислери уьшин ол ДР-нынъ Баспа министерствосы атыннан, район администрациясы Сый грамоталарына, дипломларына коьп кере тийисли этилинген.
Талаплы ис аьрекетшиси болып калмай, ол наьсипли ана, уныкларына суьйикли тетей, йиенлерине аьзиз эней де болады. Акберди-акай Башиев пен курган татым аьелинде кеделери Руслан эм Рустам, сылув кызы Зарема оьз аьеллерин курып, аьвлетлерининъ уьстинликлери мен куьезленип келедилер. Сол тувыл ма аьдемге керек наьсип дегенинъ.
Буьгуьнлерде ис йолдасым Азинет Утей кызы сыйлы мерекесин янына якын аьдемлерининъ тоьгерегинде белгилейди.
Сыйлы Азинет Утей кызына берк ден савлык, узак оьмир, аьел наьсибин, исинде келеекте де бийик етимислер йораймыз!
Г.Нурдинова.
Суьвретте: Азинет Башиева оьз ян косагы Акберди эм кызы Зарема ман.
