Аьр бир уьстинликли аьдемнинъ оьзининъ тарихи бар. Олардынъ аьр бирининъ уьйкен уьстинликке аькелген йоллары туьрли болса да, касиетлеринде бир ортаклык бар деп ойлайман: куллыксуьерлик, мырат этип билуьв, сол мыратка куьннен-куьнге ювыклав уьстинде арымай-ялкпай ислев.

Батырхан Сергеевич Бийболатовтынъ ясына карамастан, муьлк, курылыс эм уьйшиликте кулланылатаган алатларынынъ уьйкен туькенлерининъ иеси болувында сол ийги касиетлер, соны ман бирге таза юреги, халкка яхшылык сагынувы эм баьриннен де алдын Кудайдынъ коьмеги себепли болган болар.
Яс йигит бала заманыннан алып бир истен де коркпаган, авыл еринде оьскенге, эгин-кыр куллыклар ман каьрлеген, бакшада ислеген. Соны ман бирге ол окув-билим алувга да уьйкен бет берген. Батырхан Саратовтагы патшалык университетининъ юридический факультетинде билим алган. Эл алдында эр борышын Алыс Куьнтуварда намыслы толтырган. Службасын бардырган йылларда, ногайлардан биринши болып, сержант Батырхан Бийболатов Ногай районына келип, ясларды аьскерге аькеткен. Бу ис онынъ аьскерде куллыгын намыслы эм яваплы толтырганын шайытлайды.
Батырхан оьзининъ биринши туькенин ашканша, нешаклы заман уьйлерде евро-ярастырув куллыкларын усташа толтырган, нешевлерди сол иске уьйреткен. Соьйтип, куьннен-куьнге, билек туьрип ислеп, ол оьз савдасын кенъейте берген. Батырхан савда юритуьв аьрекетинде ога пайдалы болган маслагатларын берген ювыгы Рашид Аджигайткановка ра- зылык билдиреди. Бу куьнлерде Батырхан Бийболатов оьз туькенлерине муьлкти, курылыс алатларды тувра асыллавшылардан сатып алып, яшавшыларга узак калаларга бармай, Ногай районыннан тоьмен баага алмага амал бергенлердинъ бириси болады. Оннан оьзгелей, Батырхан тувган авылы Батыр-Мурзадагы межигитке минарет айырым бир боьлме салып берген, сол авылдагы бир орамнынъ йолын туьзеткен. Аьли савда базасынынъ кенъ азбарында намаз кылмага мекан салган. Солай ок Батырхан Сергеевич «Шоьл тавысы» республикалык газетасына оьзине эм куллыкшыларына деп язылады. Ол дайым да конъысыларына оьз ярдамын этпеге шалысады. Ийги, шалыскыр аьрекети уьшин, Батырхан Сергеевичтинъ суьврети «Район оьктемлиги» Сый тактасына ерлестирилген.
Тезден элимизде савда юритуьвшилер куьни белгиленеек. Биз Батырхан Бийболатовты кутлап, оьз алдына салган баьри мыратлары толганын йораймыз. Савда юритуьвши йигит болса, ясларга кайсы исти баславда да бас деп сабырлык тутув керек эм мырат этуьв де канатландырады деп маслагат береди.
Н.Кожаева.
Суьвретте: Б.Бийболатов.