Республикалык инвестиционлык программа эсабында Ногай район орталыгында 47 миллион маьнеттинъ акша карыжына орталык стадионнынъ курылысы юритиледи. Соны Хасавюрт каладан «Агат» ООО юритеди. Аьлиги заманда дренаж салув бойынша ислер бардырылады.
«Меним Дагестаным – меним йолларым» деген республикалык программа бойынша Терекли-Мектеб авылдынъ С.Капаев, Ф.Капельгородский эм Кумлинский атындагы орам йолларына 5,5 миллион маьнет акша карыжына асфальт тоьселген. Бу ислерди Махачкаладагы «Стройлайн» курылыс организациясы юритеди, генераллык директоры – М.Ибрагимов. Йогарыда белгиленген программа бойынша район етекшилерининъ тилеги мен ДР Коьлик министерствосы 7,5 миллион маьнет акша карыжын шыгарган. Солай ок бу программа бойынша М.Муртазаев атындагы орамнынъ йолына, «Нурлан» туькеннен алып Орджоникидзе мен Заргишиев атындагы орамлары косылатаган ерге дейим асфальт-бетон тоьсев ислери бардырылады. Соны ман бирге Г.Аджигельдиев атындагы орамында 750 метр узынлыгы болган яявлар юретаган сокпак курылаяк.
Ерли бюджеттинъ карыжларына Кизляр – Терекли-Мектеб автомобиль йолынынъ 30-ншы шакырымында бизим районга киретаган арка белгиси салынаяк.
«Онъайлы кала аьллери» деген программа бойынша Кадрия атындагы янъы парктынъ еринде балалар ойын майданы курылды.
Батыр-Мурза авылында эки шарлаклы, волейбол, баскетбол, стол уьстиндеги теннис, гандбол эм баска спорт ярыслары уьшин спорт залы ман 100 орынлы мектеб меканы курылады. А.Джанибеков атындагы мектеб азбарында мини-футбол ойыны бойынша стадион курылды, бу объекттинъ заказчиги биз болмасак та, ама проект-сметалык документацияды биз аьзирлегенмиз, прораб аьрекетин эм курылыс тергевин де биз юритемиз.
Ерли баславлар программасы бойынша мини-футбол ойыны уьшин стадион курылысынынъ негизин салувга Ногай район администрациясы 1,6 миллион маьнет акша шыгарган.
Шумлелик авылында курылаяк 200 орынлы мектеб меканы уьшин проект-сметалык документациясы аьзир этилинген, экспертиза соны кабыл эткен. 2023-нши йылда бу курылыс уьшин аукцион оьткерилмеге каралады.
Кумлы авылында курылаяк 100 орынлы мектеб меканы бойынша янъыларда аукцион оьткерилген, курылыстынъ подрядчиги белгиленген. Быйыл сол курылыс уьшин ерди аьзирлев куллыкларына, фундаментин куювга эм сондай баска ислерге деп 20 миллион маьнет акша карыжы шыгарылган.
Бораншы, Ленин, Эдиге авыл мектеблеринде «Точка роста» проекти бойынша тийисли класс боьлмелери ярастырылган. Солардынъ проект-сметалык документацияларын биз аьзирлегенмиз. Ярастырув ислерининъ подрядчиги «Северремстроймонтаж» ООО болады.
Район администрациясынынъ капиталлык курылыс боьлиги ДР Экономика и курылыс министерствосында Карагас, Червленные Буруны эм Терекли-Мектеб орта мектеблерининъ меканларына капиталлык ярастырув ислерин оьткеруьвге деп проект-сметалык документацияларын аьзир эткен. Юритилеек ярастырув ислерининъ ортак оьлшеми – 128 миллион маьнет акша.
Соны ман бирге Терекли-Мектеб авылында 710 орынлы мектеб меканын курув бойынша республикалык министерстволары ман проектированиеди аьзирлев уьшин соьйлесуьв юритиледи.
Район еринде 9 артезианларды казувга деп бизим боьлигимиз район администрациясынынъ архитектура эм ер боьликлери мен бирге республикадынъ курылыс, экономика министерстволары, архитектура эм градостроительство комитети мен соьйлесуьв уьшин техникалык документациясын аьзирлеп кутарган.
Солай ок район аькимбасы Джамалутдин Эсиргеповтынъ тапшырувы ман Терекли-Мектеб авылдан 3 шакырым эректеги сырт ягындагы кокыс тоьгилетаган ерди коралав бойынша проект-сметалык документациясын аьзирлев иси бардырылады.
Соьзимиздинъ ызында районнынъ билимлендируьв боьлиги мектеблерде уьйкен класслардынъ окувшылары ман келеектеги ис кеспилерин сайлав ман байланыслы шаралар юриткенде, оларды инженер специальностьлерин (курылыс инженерлери, электрик инженерлери, йол инженерлери эм с.б.) сайлавга онъласа ийги болар эди деп ойлаймыз.
А.Тангатаров,
«Ногайский район» МР администрациясынынъ ОКС МКУ директоры.
