Оьткен юма сонъгы куьн, 23-нши апрель куьн, Куьнбатар авылынынъ Муса Курманалиев атындагы орта мектебине авыл яшавшылары, солай ок районнынъ Эдиге, Бораншы, Терекли-Мектеб, Карагас авылларыннан аьдемлер туьске  йыйылып басладылар. Олар авылдасы — шаьйир А.Култаев пен йолыспага келгенлер. Йолыгысты уйгынлавшылар — авыл администрациясы, Куьнбатар авыл библиотекасы,ерли мектеб коллективи боладылар.
Бас дегенде йыйылганлар Анвар-Бек Култаевтинъ яшав йолы эм адабиатына багысланган выставкасы ман танысадылар,онынъ коллары астыннан шыккан китаьплерин алып карайдылар, аьр биревлери автографын алдылар.
Сосы йолыгыста ерли мектеб етекшиси Тамара Бариева шыгып соьйлеп, Анвар-Бек Култаевти баьри йыйылганлар атларыннан кутлады эм онынъ яшав йолы эм яратувшылык аьрекети акында айтып озды.Онынъ айтувы бойынша, Анвар-Бек Култаев йырмага ювык китаьплердинъ авторы.Онынъ язганлары дуныядынъ 23 тилине де коьширилген эм бу куьнлерде Дагыстаннынъ язувшылар Союзынынъ секретари,ногай секциясынынъ етекшиси.
Ершов атындагы савлайдуныялык адабиат савгасынынъ лауреаты,Дагыстаннынъ культурасынынъ ат казанган куллыкшысы,яслардынъ наьсихатшысы.Мектебте онынъ язганларын аьр заман йылы кепте йолыгадылар.
Сонъ мектебтинъ 3-нши — 8-нши классларынынъ окувшылары шаьйирдинъ ятлавларын окыдылар эм онынъ соьзлерине язылган йырларды йырладылар.
Йыйылганлар алдында оьз йоравларын Анвар-Бек Култаевке авылдынъ ясы уьйкенлери атларыннан ис ветераны Шарапутдин Маликов,авыл библиотека заведующийи Арапа Шекирова, иниси Исраил Култаев,авыл яшавшылары Якуб Менълиязов, Мурзабек Савкатов эм баскалары айтып алдылар,аьзирлеген савгаларын да тапшырдылар.
Куьнбатаршы хатын-кызлар атларыннан  эм конъысы болып яшаган Вайдат Маликова шаьйирге авылшы хатын-кызлары оны бек сыйлайтаганы,оьрметлейтаганы эм язганларын суьйип окыйтаганы эм йырларын да аьр заман йырлап келетаганы акында билдирип алды,аьли де ногай хатын-кызлары акында язбага тилегин салды.
Йолыгыста республикалык ногай секциясынынъ агзасы,Россия язувшылар союзынынъ агзасы,шаьйир Алибек Капланов йыйылганларга кызыклы кепте Анвар-Бек Култаевтинъ тек ногай адабиатына тувыл,савлай Дагыстан адабиатына салган косымы эм ногай ямагаты арасында уьйкен сыйы эм ногайлардан биринши болып Дагыстаннынъ халк шаьйири деген йогары атка тийисли болувы оьз-оьзиннен болмаганы акында кызыклы хабарлавын этти..
Сонъында соьз сыйлы конак Анвар-Бек Култаевке берилди.Ол оьзининъ соьзинде куьнтаршыларга эм баьри де йыйылганларга уьйкен разылыгые билдирди.Оьзининъ енъил болмаган яшав йолы калай оьтир баратаганы акында хабарлады эм оннан сонъ Токиодагы Олимпиалык чемпионы Альберт Баитыргазиевке багысланган дестан уьзигин,ана акында балладасын эм сонъгы заманда язылган ятлавларын окып эситтирди.
Сонъында йыйылганлар конакка коьплеген соравларын да бермей эм явабын алмай болмадылар.Кызыклы йолыгыс туьрли йосыкта суьвретлерге туьсуьви мен тамамланды.
Кыскаша,куьнбатаршылар оьзининъ авылдас шаьйири Анвар-Бек Култаевке  баьри ягыннан да йылы кепте йолыгыс эттилер демеге боламыз.
Канитат Кокеева,мектеб завучы.