Янъыларда Дагестан етекшиси Сергей Меликовтынъ етекшилиги астында кенъес оьткерилди. Онда куьн аьлиндеги оьткир соравлар ойласылды: айтпага, толтырувшы власть органлары ман бюджет амалларын кулланув, сакатлыгы бар эм ата-аналар ягыннан каравсыз калган балаларды турак уьйлер мен канагатлав бойынша шаралар, колайсыз яшайтаган гражданларга социаллык яктан ярдам этуьв акында.
Республика етекшиси власть органларынынъ эм муниципалитетлердинъ эндиги йылга планлавда бюджет амалларын пайдалыгы ман кулланувга эсин каратты. Онынъ белгилеви мен, бюджетти планлавда (а ол бу ай басланаяк) аьдемлердинъ керексинуьвлерин, социаллык объектлерининъ курылысын, туьрли учреждениелерде ремонтлав ислерин юритуьвди эсапка алув керек.
Сергей Меликов 1-нши сентябрьге дейим турак уьй мен канагатланмага керек етим балалар списогын тергевди тамамламага тапшырув берди.
– Сол списокка бирерде балалар да, етимлер де туьспей каладылар. Сол списоклар кайтип туьзилетаганга, турак уьй мен канагатлавда шерет кайдай негизде туьзилетаганын билуьв керек, – деди ол.
Россия Президентм Владимир Путиннинъ республика ерине ис визити мен келуьви акында айта берип, Сергей Меликов кенъесте туризм темасы босына сайланмаганын белгиледи.
– Дагестан уьшин туризм – армаганда социал-экономикалык оьрленуьвининъ негизлерининъ бириси. Бу тармактынъ оьрленуьви мен янъы ис орынлар, дагестанлылар уьшин янъы яшав аьллер туьзмеге эп бар. Сонынъ уьшин де туризм темасына Россия Президентининъ етекшилиги астында оьткен кенъесте эс каратылды, – деди ол.