11-нши августта «Ногайский район» МР Депутатлар йыйынынынъ кезекли 34-нши сессиясы болып оьтти.
Сессияда район Депутатлар йыйынынынъ председатели Руслан Насыров, онынъ орынбасары Увылбийке Шандавова, «Ногайский район» МР администрациясынынъ аькимбасы Мухтарбий Аджеков, район депутатлары, етекшилер катнастылар.
Йыйылганлар биринши болып «ДР «Ногайский район» МР Уставына туьрленислер эм косылувлар киргистуьв акында» деген сорав бойынша район Депутатлар йыйынынынъ председателининъ орынбасары Увылбийке Шандавовадынъ информациясын тынъладылар. Район депутатлары район Уставына Россия Федерациясынынъ законодательствосы ман келисли аьлде туьрленислер киргистуьвлерди бир тавыстан кабыл эттилер.
Сессиядынъ куьн йосыгындагы 2019-ншы йыл уьшин «Ногайский район» МР бюджетининъ толтырылувы акында эсап беруьвди беркитуьв акында» деген экинши соравы бойынша район администрациясынынъ финанслар боьлигининъ етекшиси Арслан Кусегенов шыгып соьйледи. Онынъ айтувы ман, «Ногайский район» МР консолидированлы бюджети оьткен 2019-ншы йылда келимлер бойынша 613 миллион 676 мынъ маьнетке яде 95,7 процентке толтырылган. Налоглар эм налог тувыл келимлери 131 миллион 692 мынъ маьнетке яде 104 процентке етискен. Бу санлар, 2018-нши йыл ман тенълестиргенде, 6 миллион 20 мынъ маьнетке артык яде план толувы 104,8 процент болады.
Депутатлар Арслан Кусегеновтынъ эсап беруьвин тынълап болып, соны кабыл эттилер.
Сессияда коронавирус маразы ман байланыслы район еринде туьзилген эпидемиологиялык аьллери эм сондай аьллерде тойларды оьткеруьв, Терекли-Мектеб авылда кокысты йыюв эм аькетуьв маьселеси, оьткен юма районга ДР савлык саклав министри Джамалудин Гаджиибрагимовтынъ келуьви, район ерлерининъ такыр-кумга айланып барувы акында эм сондай коьп баска соравлар ойласылды.
Сессияда «Ногайский ра- йон» МР администрациясынынъ аькимбасы Мухтарбий Аджеков, район ямагат палатасынынъ председатели Эльмурза Саитов, район депутаты Рустам Адильгереев, «Шоьл тавысы» республикалык газетасынынъ бас редакторы Эльмира Кожаева оьз ойлары ман боьлистилер.
Сессиядынъ акында материал газетадынъ кезекли номеринде баспаланаяк.
Бизим хабаршы.
