Янъыларда А-Х.Джанибеков атындагы орта мектебинде орынласкан «Точка роста» орталыгында «Педагог-пси- хологлардынъ авыр яшав аьллеринде болган саьбийлер мен коррекционлык-оьрлендируьв иси» деген тема бойынша тоьгерек столы уйгынланып оьтти. Тоьгерек столына деп туьрли организациялардан специалистлер шакырылган эдилер.
Олар – ясы етпегенлердинъ ислери бойынша комиссиядынъ секретари З.Аджиманбетова, Ногай районнынъ Хатын-кызлар советининъ председатели А.Манкаева, А-Х.Джанибеков атындагы мектебининъ етекшиси К.Ярикбаева, «Ногайский район» МР администрациясынынъ билимлендируьв боьлигининъ методисти А.Мурзагишиева, Балалар уьшин спорт мектебининъ етекшиси К.Бекмурзаев, «Яслык» яслар орталыгынынъ етекшиси Н.Арсланов, Яшавшыларды социаллык яктан канагатлав орталыгынынъ боьлик етекшиси А.Агисова, ПДН тамада инспекторы К.Акмурзаева, район мектеблерининъ педагог-психологлары тоьгерек столында белсенли катнастылар. Тоьгерек столын А-Х.Джанибеков атындагы мектебининъ педагог-психологы Э.Аметова юритти. Шарады Джанибеков атындагы мектебининъ етекшиси К.Ярикбаева ашты эм йыйылган конакларды хош коьрип алды, солай болып, ол тоьгерек столынынъ куллыгына онъайлы исти йорады.
Тоьгерек столы бойынша йыйылганлар ман профилактикалык эсабында турган оьспирлердинъ аьли бойынша соравлары каралды. Элбетте, олардынъ кайбиревлери оьзлерин ийги юритуьви мен байланыста эсапта турувдан тайдырылганы бек суьйиндиретаганын да айтпай болмадылар. Буьгуьнлерде сол оьспирлердинъ кайбиревлери спорт тармагында эм баска ямагатлык аьрекетлеринде де оьзлерин тавып, буьгуьнлерде тенълери эм оьсип келеятырган яс арка арасында коьрим болып келетаганлары акында айттылар. Шарага шакырылган конаклар кыйын аьллеринде болган балалар ман районда, районнынъ мектеблеринде кайдай куллыклары юритилетаганы эм келеекте де кайдай аьрекети этилмеге кереги акында оьз маслагатлары ман боьлистилер, ис аьрекетлериннен туьрли мысаллар келтирдилер. Аьр кимнинъ де тоьгерек столында туьрли кыйнайтаган, кызыксынатаган соравларына толы явапларын алмага амаллары болды.
Шарадынъ сонъында педагог-психологы Э.Аме- това ман уйгынланып озгарылган «Оьзинъди билуьв» деген тренинг дерисинде баьри шара катнасувшылары да белсенли ортакшылык эттилер.
Соьйтип, шара пайдалы эм йогары коьнъилде оьтти.
Г.Нурдинова.
Суьвретте: шарадан коьринис.
