Терекли-Мектебтинъ Кадрия атындагы орта мектебинде «Оьзимиздикилерди кыйынлыкта тасламаймыз» деген шакырув астында «Аьскершиге посылка» деген акция озгарылды. Онда окытувшылар, окувшылар эм олардынъ ата-аналары ортакшылык эттилер. Аьриси сол затты ак юрегиннен этти, СВО-да бизим енъуьв исине оьз уьлисин коспага уьйкен ниетлиги болып. Биревге де сол ак ниетли исте катнасув уьшин тилек салынмаган, гуманитарлык коьмек этуьв аьрекетин баьриси де юрек шакырувы ман юргисттилер.

– Биз аян анълаймыз: йогары власть органлары ман белгиленген согыс спецоперациясында ортакшылык этетаган бизим аьскершилеримиз, оьз яшавларын аямай, тувган Эли алдында эр борышын йигитлик пен толтырадылар, савлай ер юзин нацизмнен куткарадылар. Бу авыр заманда олар россияншылар яктан якланатаганды сезгени бек маьнели, – деп каратты оьз соьзин акция катнасувшыларына Кадрия атындагы мектеб директоры Альфия Акимова. Акция озгарылув тамамында район маданият алдындагы майданда озгарылган йыйында мектебтинъ Ата-аналар комитети, ортак мектеблик Ата-аналар комитетининъ председатели С.Саитова, Ногай район Хатын-кызлар комитетининъ председатели А.Манкаева ортакшылык эттилер.
– Сизинъ мектеб окувшыларынъыздынъ посылкалары эм суьвретлер мен хатлары – ол буьгуьнде, Украина ерин нацистлерден босата берип, тынышлыкты саклавга оьз уьлисин косадылар. Соьзсиз де, бу посылкалар эм окувшылардынъ хатлары оларды яклайтаган, келеекке ынанымды куьшлендирип, бу ак ниетли исте сенимликти эм куьш-куватлыкты арттырып, Тувган Эли мен байланыстыратаган берк йип эсабында болады, – деп тамамлады соьзди Асият Манкаева.
– Шетте турмай, бу акцияда белсенли ортакшылык эткен Кадрия атындагы орта мектебининъ баьри куллыкшыларына, окувшыларга эм олардынъ ата-аналарына ак юректен разымыз. Биз биргелесте бизим Аталыгымыздынъ алал увылларынынъ ата юртына ювык арада кайтканын куьтемиз. Биз енъуьвге етисермиз! Тынышлык уьшин! Эркинлик уьшин! Россия уьшин! Бизим Президент уьшин! – деди ол.