Янъыларда Дагестан Республикасынынъ Аькимбасынынъ кесек заманга куллыгын юритуьвши Сергей Меликовтынъ етекшилеви мен Дагестанда Наркотиклерге карсы комиссиясынынъ кенъеси оьтти.

Сол йыйында Сергей Меликов Дагестан Республикасында наркотикли аьлге авыр деген белги беретаганын айтты.
Республикада наркотикли алатларга бойсынатаганлардынъ реабилитациясы уьшин патшалык учреждениелер йок.
Соны ман байланыста Дагестаннынъ Аькимбасынынъ куллыгын юритуьвши Сергей Меликов ДР Оькиметине наркомаразлылардынъ социаллык реабилитациясына айырым республикалык орталык курувдан тура соравды карамага буйырык берди, сонынъ уьшин аьли ислеп турган баска социаллык учреждениесин туьрлендирмеге туьсеегин де айтты.
Ногай районында мунавдай аьллер. Бизде стационар да эм наркоманиядынъ алдын шалув эм эмлев мен каьр шеккен медицина куллыкшылары да бар.
Муниципалитет яшавшылары, боьтен де оьспирлер сырасында, наркотик алатларды кулланувдынъ уьйкен зарары акында дайым да хабарласувлар юритиледи.
«Наркотиклерди дайым кулланатаганлар Ногай районында йок. Сондай аьл 1-1,5 йыл ишинде сакланады.
Ногай ЦРБ 5 йылдынъ узагында Билимлендируьв управлениеси мен биргелес районнынъ баьри мектеблеринде йыл сайын тестирование озгарады. Оннан оьзгелей, йылда 4-5 кайта Ногай районынынъ администрациясы, ерли ОМВД, дин куллыкшылары эм муниципалитеттинъ спорт мектеблерининъ ваькиллери мен биргелес тоьгерек столлар эм форумлар оьткередилер. Солай ок Ногай район орталык больницасына келген аьдемлер мен де наркотикли алатлар кулланувдынъ зарары акында хабарласувлар юритиледилер», – деп Ногай районындагы аьлдинъ акында Ногай ЦРБ-дынъ врач-наркологы Юпархан Нурлубаева анълатады.