Язлыктынъ келуьви мен бирге, аьдетке коьре, авыл хозяйство товарларын болдырувшылардынъ ис аьрекети де янланады.

Буьгуьнлерде Ногай районынынъ эгинши-фермер хозяйстволарында кой козылав яваплы куллыклары кайнавлы заман. Быйылгы кыс айлары йылы болып оьткенге район хозяйстволарында аьлиги заманга козыламага тарык ана койлардынъ 70-80 проценти козылаган деп билдиреди Ногай район авыл хозяйство управлениеси. Быйылгы тоьл алув шагында аьр 100 ана койдан 70-75 козы аман алынып сакланады. Районнынъ кой козылаяк баьри отарларында да сол ислерге эртеректен аьзирлик коьрилген: мал туратаган меканлар тазаланган эм акланган, базлар ярастырылган, аязлы куьнлер болып калса деп йылы мал меканлары аьзирленген.
Быйылгы аслык онъысы уьшин деп район бойынша баьриси 2145 гектар эгин кырларда «Иридас», «Граф», «Тимирязевка-150», «Алексеич», «Таня», «Канадка» деген куьзлик бийдайдынъ сапатлы урлыклары шашылган. Эгин кырларга барып юритилген тергевлер сырагысында куьзлик культуралардынъ оьсуьви коьп ягыннан аьруьв деп белгиленген. Соларга солай ок 1890 гектар майданларда аммиак селитрасы да себилген.
Айтпага, «Аджигайтканова С.С.» эгинши-фермер хозяйствосы – 935 гектар, «Лашын» КФХ – 425 гектар, «Мансур» КФХ – 440 гектар, «Куванаев М.М.» КФХ – 156 гектар, «Барлык-2» – 188 гектар майданларда бийдай эккенлер.
Буьгуьнлерге район бойынша баьриси 10100 гектар эгин ерлери айдалып аьзирленген. Аьли уьшин район эгиншилери 1110 гектарда арпа, 130 гектарда сулы, 395 гектарда люцерна, 40 гектарда ералма, 48 гектарда ясылшалар шашканлар.
Язлык ислери армаган бардырыладылар.
М.Юнусов.