Дагестан халкларынынъ бирлесуьв куьнинде регион аькимбасы Сергей Меликов туьрли несиллер эм туьрли ис орынларда – авыл хозяйство, маданият, билимлендируьв, спорт, савлык саклав тармакларда уьстинликли кыйын салган ердеслеримизге, ямагат эм оькимет аьрекетшилерине оькиметлик савгаларын тапшырды. Айтпага, Дагестаннынъ Академиялык ат казанган «Лезгинка» биюв ансамбли. Ол «Мир сквозь танец» деген программасын Донецк эм Луганск республикаларында совет аьскершилери эм ополченецлер алдында коьрсеткен.
Республикалык байрам куьнинде савкатка тийисли болды Сергей Меликов та. Сол куьн «Коьримли иси уьшин» медали мен савгаланган фотосуьвретши Иван Козорезов республика етекшисине «Дагестан. Страна гор» деген фотоальбом тапшырды.
***
Россия Федерация Оькиметининъ Председателининъ орынбасары – РФ Промышленность эм савда министри Денис Мантуров Дагестан еринде ис визити мен болып кетти.
***
Дагестан Республикасына социаллык контракт беркитуьвге гражданларга коьмек этуьв уьшин косымша эсабында 8,8 млн. маьнет акша йиберилеек. РФ Оькиметининъ Председатели Михаил Мишустиннинъ белгилеви мен, ол аьдемлерге оькиметке таянув ман акша казанмага эм оьз материаллык аьлин ийгилендирмеге эп туьзеек.
***
ДР Аькимбасы Сергей Меликов уллы дагестан шаири Расул Гамзатовтынъ мерекеси мен байланыста уйгынланган «Ак турналар» деген согыс-патриотлык экскурсиясында ортакшылык этти. Регион етекшиси бас каламыз Махачкала бойынша экскурсияды «Большая перемена» деген Савлайроссиялык конкурсынынъ енъуьвшиси, ДГМУ студенти эм экскурсия маршрутынынъ авторы Даниял Шабанов пан оьтти.
Экскурсия маршруты – Дагестаннынъ халк шаирлери Гамзат Цадасадынъ, Сулейман Стальскийдинъ эм Абуталиб Гафуровтынъ эстеликлери, солай ок ис борышларын толтырувда янларын берген милиционерлердинъ мемориалы. Оннан баска болып, экскурсия программасына Поэзия театры эм С.М.Омаров атындагы 1-нши номерли Гимназия (мунда окып, Уллы Аталык согысында йигитлиги уьшин Совет Союзынынъ Баьтирлери деген сыйлы атка бес аьдем эм туьрли орденлерге эм медальлерге 175 аьдемлер тийисли болган).
Дагестан суьвретшилерининъ оьнер усталыгы ман регион етекшиси П.Гамзатова атындагы саниятлар музейинде танысты. Экскурсия маршрутынынъ энъ ызгы ери ДР Язувшылар союзы болды.