Ногай муниципаллык районынынь администрациясында оьткен аппарат кенъеси район активин янъы сайланган «Ногайский район» МР администрациясынынь аькимбасы Джамалутдин Эсиргепов пан таныстырувдан басланды.
Кенъести район аькимбасынынь орынбасары Хамидулла Саитов ашты эм юритти. Ол кыска кепте яньыларда бу ок залда болып озган район аькимбасынынъ ис орынына сайлавга кандидатларды айырув конкурс комиссиясынынъ сырагылары акында хабарлады. «Сол куьн ок Ногай муниципаллык районынынъ Депутатлар йыйынынынъ кезексиз 51-нши сессиясы болып оьтти эм сонда алдыдагы бесйыллык ис болжалына районнынъ янъы етекшиси сайланды. Тавыславда ортакшылык эткен район Депутатлар йыйынынынъ 12 депутаты Джамалутдин Эсиргепов уьшин баьриси де оьз тавысларын бергенлер», – деди Хамидулла Саитов. Ол сол ерде ок та район администрациясынынъ аькимбасынынъ ис орынына Джамалутдин Эсиргепов сайланганы акында район Депутатлар йыйынынынъ карарын окыды. Саитов оьз ягыннан муниципалитеттинъ янъы етекшисин йогары яваплы орынга сайланувы ман кутлады эм ога уьстинликлер йорады.
Кенъесте район активине каратылган соьзи мен Джамалутдин Эсиргепов соьйледи. Ол ал деп район яшавшыларына, депутатларга ога сондай сеним эткенлери уьшин разылыгын билдирди.
– Бу зат келеекте меним уьшин халкымызга, баьри яшавшыларга куллык этуьвиме уьйкен демевлик болар. Бизим баьримиздинъ де алдымызда уьйкен борышлар турадылар. Аьр биримиз эгер оьз борышларымызды толтырувга анъламлы эм яваплы кепте янассак, буьгуьнлерде ямагатымыз алдында туратаган маьселелерди шешпеге енъил болар.
Ногай район администрациясынынъ аькимбасынынъ ис орынына туьсеятып, мен оьз борышларымды туьз эм намыслы кепте Россия Федерациясынынъ эм Дагестан Республикасынынъ конституциялары эм муниципаллык районынынъ Уставы ман келисли аьлде толтыраягыма соьз беремен.
Биринши куьнлерден алып оьзимди куллык этуьвге онълайман, – деди район активине муниципалитеттинъ янъы сайланган басшысы.
Джамалутдин Эсиргеповты ис орынына туьсуьви мен Дагестан Республикасынынъ Халк Йыйынынынъ депутаты, КПРФ рескомынынъ секретари, КПРФ Ногай РК 1-нши секретари Мурзадин Авезов кутлады.
– Аьлиги заманларда етекши болып куллык этуьв бек кыйынлы, – деди ол. – Заман авыр, биз аьли ярты согыс аьллеринде яшаймыз демеге де болады. Сизинъ бактынъызга, Джамалутдин Айнадинович, сондай заман карсы болып туры, тезден федераллык законлары ман келисли аьлде ерли муниципалитетлер оьлшемлеринде структуралык туьрленислери оьткерилеек. Олай дегени, бизде эндигиден армаган авыл муниципаллык туьзилислери тайдырылады, район оьзи де муниципаллык округ болып токтаяк. Сонынъ уьшин бизим маслагатымыз сизге: соны ман байланыслы соравлар район ямагаты ман ойласылып шешилсин.
Муннан сонъ янъыларда район депутатлар корпусы ман Депутатлар йыйынынынь председатели этилинип сайланган Рустам Байманбетов соьйледи. Ол конкурс комиссиясынынъ куллыгынынъ йолы эм район администрациясынынъ аькимбасын сайлав акында хабарлады.
– Биз билемиз, Джамалутдин Айнадинович билимли, оьз исининъ сулыплы специалисти, ол оьзининъ тувган авылында хыйлы заман мектеб директоры болып куллык эткен. Эндиги ога бизим районнынь етекшиси ис орынында таза намыс пан эм етимисли кепте куллык этуьвди йорайман, – деди оьз соьзинде Рустам Байманбетов.
Районнынъ депутатлар корпусы атыннан янъы сайланган район аькимбасын эм Депутатлар йыйынынынъ председателин район депутаты Мадина Абдулалимова кутлады эм оьз йоравларын айтты.
– Сиз, Джамалутдин Айнадинович, янъыларда район етекшиси болдынъыз. Сизге алдыда оьзинъиз бен бирге сайланган район Депутатлар йыйынынынъ председатели Рустам Янибекович пен тыпак аьлде бизим районымыз алдында туратаган маьселелерди эм соравларды шешпеге туьсеек. Мен сизге илгериге сенимлик пен, оьзинъиз бен бирге ислегенлерге – разылык пан, а буьгуьнлерде сизи мен бирге куллык этип турганларга – сый-оьрмет пен каранъыз деп йорайман. Уьстинликлер сизге! – деди Мадина Абдулалимова.
Муниципаллык районнынъ янъы етекшилерин кутлаганлардынъ арасында Россиядынъ ат казанган маданият куллыкшысы Яхья Кудайбердиевтинъ айткан соьзлери де эсте калдылар. Ол оьзи тувган Нариман авылыннан халкымыздынъ эм элимиздинъ тарихинде сакланган баьтирлер, абырайлы етекшилер, сулыплы врачлар, педагоглар, илми эм маданият аьрекетшилери шыкканын белгиледи. «Янъыларда сайланган район аькимбасы да бизим Нариман авылында тувып-оьскен. Джамалутдин Айнадинович оьз халкынынъ тарихин, аьдетлерин, кайгы-касуьветин ийги биледи эм анълайды деди Кудайбердиев. – Сол себептен биз оьзимиз де буьтин бир тилли халк болып ал деп бизим етекшилеримизди баьри ягыннан да колтыкламага керекпиз. Тек сол заман бизим алдымызда оьрленуьвдинъ янъы йоллары эм янъы енъуьвлери яркырап коьринер», – деп белгиледи Яхья Кудайбердиев.
Джамалутдин Эсиргепов пан Рустам Байманбетовты йогары яваплы етекши ис орынларына сайланувлары ман «Единая Россия» Савлайроссиялык политикалык партиясынынъ ерли Ногай боьлигининъ яваплы секретари Амирхан Межитов, Терекли-Мектеб авыл администрациясынынъ аькимбасы, «Ногай Эл» регионаллык НКА председатели Зейдулла Аджибайрамов, Ногай районынынъ Савытлы куьшлер эм ыхтыяр саклавшы органларынынъ ветеранлар советининъ председатели Акманбет Сангишиев, билимлендируьв куллыкшыларынынъ профсоюзынынъ район комитетининъ председатели Медина Гапарова, А-Х.Джанибеков атындагы Терекли-Мектеб ортак билимлендируьв мектебининъ директоры Курасхан Ярикбаева кутладылар.
Аппарат кенъесининъ катнасувшылары Ногай районында янъы коронавирус юкпалы маразы ман байланыслы аьллер акында Ногай ЦРБ бас врачынынъ эмлев бойынша орынбасары Зафира Куруптурсуновадынъ информациясын тынъладылар. Онынъ айтувы ман, йыл басыннан алып район орталык больницасында 407 авырувлылар эсапка алынган, олардынъ ишинде COVID-19 маразы ман авырыганлар саны – 304 аьдем деп белгиленген. Баьриси 2711 авырувлылар тергевди оьткенлер. Буьгуьнлерде Ногай ЦРБ бойынша коронавирус пан авырыган бир аьдем де йок деп саналады деп билдирди бас врачтынъ орынбасары. Район бойынша 12300 аьдем вакцинацияды оьтпеге тийисли болса, буьгуьн уьшин 9491 аьдем вакцинады урдырган эм 2670 аьдем соны кайтадан урдырган, соны ман баьриси 12161 аьдем вакцинацияды оьткен. Солай ок район бойынша 50 балага да вакцина урылган.
«ЦРБ-да тийисли оьлшемде вакцина бар. Вакцинация ман вакцинацияды кайтадан оьтпеге ниети бар болганларды биз куьтемиз», – деди Зафира Куруптурсунова.
Муннан сонъ кенъестинъ барысында район еринде болып оьткен «Йибек йолы – 2022» деп аталган халклар ара автораллидинъ сырагылары акында Сабират Абубекерова хабарлады.
М.Ханов.
Суьвретлерде: йогарыда янъы сайланган «Ногайский район» МР администрация аькимбасы Д.Эсиргепов Р.Байманбетов пан; кенъес катнасувшылары.
