Сондай тема бойынша А.Тахо-Годи атындагы музейининъ Ногай районындагы филиалында, сонынъ етекшиси Каирбек Сейдахмет увылы Бальгишиевтинъ эм Ногай район Хатын-кызлар советининъ етекшиси Асият Бадий кызы Манкаевадынъ етекшилеви астында аналарга багысланган шара озды. Шарада Кадрия атындагы орта мектебининъ ана куьнине багысланып озгарылган яттан ятлав окув конкурсынынъ енъуьвшилери, олардынъ аналары ман тетейлери эм Ногай район администрациясында аьрекетин бардыратаган «Яслык» яслар орталыгынынъ куллыкшылары Абибулла Шамбилов пан Азиз Аджиев катнастылар. Аналарга багысланган кешликти ерли уьлке танув музейининъ куллыкшысы, окытувшы Зульфия Отарова юритти.
Бу куьн биринши соьз Ногай район Хатын-кызлар советининъ председатели Асият Манкаевага берилди. Ол болса, энъ де баслап, келген конакларды келген байрам ман кутлады, аьр бирисине ден савлыкты, наьсипти йорап кетти. Бу байрамнынъ ясы да йогын белгиледи.
– Анасынынъ да, баладынъ анасына да суьйимининъ шети йок. Сондай таза суьйимди мен белгили ногай язувшымыз Мурат Авезовты мысал этип айтпага суьемен. Балалар, эсинъизде болсын, анага суьйимди кайдай аьлде де коьрсетпеге болады. Коьп йыллар артта, Мурат Авезов анасы Эльбике Отегеновага (ол да элимиздинъ мине деген аьдеми), анасы съездке бараяктан алдын лакированный туфли аькелген эди. Сондай мысаллар не шаклы да келтирмеге болады, ама, балалар, эсинъизде болсын, баьриннен де баалы аналарга сизинъ эс беруьвинъиз, – деди А.Манкаева.
Шарады Сраждин Батыров атындагы саниятлар мектебининъ тербияланувшысы, коьплеген район, республикалык эм онынъ тысында озгарылган конкурслардынъ енъуьвшиси Ибрагим Аджибекберов оьзининъ «Тоьре сазын» домбырада ойнавы ман ярасыклады.
Уьлке танув музейине келген хатын-аналарды «Яслык» яслар орталыгынынъ етекшиси Абибулла Шамбилов Ана куьни мен кутлап, хатынларга гуьллер савгалады. Оннан сонъ окувшылар Д.Кокоев, О.Магомедов, С.Юнусова, З.Магомедова, М.Абдулмусаурова, Ф.Арунова аналарга багысланган ятлавларын ярасыклы аьлде окыдылар. Окувшылардынъ ятлав окув оьнерлери йогары дережеде эди. Аьр бириси ятлавды сезип, терен маьнелигин коьрсетпеге шалысты. Меним эсимди эм коьз карасымды Милана Абдулмусаурова каратты. Ол окыган ятлавына оьзи синъди, салган аьр бир токтав белгиси оьз еринде эди. Бу кыздынъ ятлав окувы айлак йогары дережеде эди.
Балаларды таьтли савгалар эм Сый грамоталар ман Асият Манкаева савгалады.
Келген конакларды эм окувшыларды музей етекшиси Каирбек Бальгишиев хош коьрип алды эм кутлав соьзин де айтып кетти.
Шарадынъ барысында Асият Бадий кызы Манкаева келген тетейлер мен энейлерге эм аналарга кызыклы соравлар берди эм соларга кызыклы яваплар да алды. Ана куьнине багысланган шара таьтли азыклар туьзилген сыпырадынъ тоьгерегинде шай ишуьв мен тамамланды.
Г.Сагиндикова.
Суьвретте: шарадан коьринис.
