Оьткен айда Ставрополь крайынынъ Нефтекум районынынъ Махмуд-Мектеб авыл орта мектебинде белгили ногай аьлими, филология илмилер кандидаты Юмав Юманияз увылы Каракаевтинъ аьрекети мен «Мамай» деген бурынгы ногай баьтир эпосы эм эпостынъ акында язылган материаллар негизинде туьзилген китапти халкка коьрсетуьв шарасы болып озган.
Бу шарада Дагестаннынъ Ногай районыннан белгили ногай шаирлери эм язувшылары Магомет Кожаев, Магомет-Али Ханов, ногай композиторы Яхья Кудайбердиев, фольклоршы Зарманбет Саитов катнастылар.
Шарады авыл мектебининъ окытувшысы Мутлихан Омаргазиева ашты эм Ю.Каракаевтинъ яшав, ис йолы, илми-тергев аьрекети акында кыска кепте хабарлады. Оннан сонъ соьзди аьлимнинъ оьзине бердилер.
Шыгып соьйлевинде Ю.Каракаев халкымыздынъ энъ суьйикли бурынгы баьтир йырларынынъ бириси «Мамайды» айырым китап этип туьзуьв аьрекети акында айтты. Аьлимнинъ соьзине коьре, «Мамай» дестаны акында биринши язылма текстлер аьли патша заманында ногай эм кумык фольклорлерин тергевши Магомед Османовтынъ «Ногай эм кумык текстлери» деген йыйынтыгында дуныя ярыгын коьргенлер.
Ю.Каракаевтинъ айтувы ман, янъы йыйынтыкка «Ногайдынъ кырк баьтири» дестанлары ишиннен бар болган баьтиршилик «Мамай» дестаннынъ ети варианты киргистилген. Китапте белгили аталык фольклор тергевшилери академик В.М.Жирмунскийдинъ эм А.И-М.Сикалиевтинъ «Мамай» эпосына багысланган куллыкларынынъ кесеклери де орынластырылган.
Йыйынтыктынъ иштелигинде солай ок Юмав Юманияз улынынъ оьзининъ «Мамай» ногай баьтир эпосынынъ бир колязба вариантынынъ тили акында» деп аталып ерлестирилген илми макаласы да бар.
Китаптинъ илми редакторы А.И-М.Сикалиев (Алла ога тынышлык берсин) болады. Йыйынтык У.Алиев атындагы Карашай-Шеркеш патшалык университетининъ ре- дакционлык-издательлик советининъ карары ман баспаланган.
Китапти белгили ногай суьв-ретшиси, скульптор Кошали Зарманбетов безеклеген. Соны баспадан шыгарувга Ногай регионаллык миллет-маданият автономиясынынъ Ставрополь крайындагы исполкомынынъ председатели Бегали Аджениязов спонсорлык ярдамын эткен.
М.Юнусов.
