12-нши апрельде Дагестан Аькимбасы Сергей Меликовтынъ етекшилиги астында янъы коронавируслы инфекциядынъ яйылувына карсы турув оперштабынынъ кенъеси озгарылды. Ол пандемиядынъ яйылувы ман байланыслы аьл заьлимдей ийгиленгенин белгиледи. Соны ман, онынъ айтувына коьре, больницага салынмага керексинетаганлар, солай ок амбулатория аьлинде эмленетаган авырувлылар саны кемиген.

Соны ман бирге ол авырувдынъ 6-ншы толкынынынъ кавыфлыгы акында эске салды эм яваплы органларды туьзилген аьлдинъ мониторингин озгармага шакырув этти.
– Бизим аьрекетлигимизди тийислисинше заманы ман озгарув уьшин аьл калай да туьзилмеге болаягын эсапка алув бек маьнели. Соны ман байланыста, планда белгиленген медициналык коьмек этуьв оьлшемин кайтадан тургызув бойынша шараларды яшавга шыгара берип, авырувлыларды больницаларга яткарув фондынынъ аьзирлигин сакламага керек, – деп белгиледи Дагестан Аькимбасы.
Кенъес барысында вакцинацияды оьтпеге керекли дагестанлылардынъ 94 проценти коронавируслы инфекциядан прививка эттиргени белгиленген. Вице-премьер Мурат Казиев белгилегенлей, 2-нши апрельде республикага, 105600 аьдемге эсапланган коронавируслы инфекцияга карсы «Гам-КОВИД-Вак» вакцинасы аькелинген. Ол республика калаларынынъ эм районларынынъ баьри медициналык организацияларына уьлестирилип еткерилген. Кериде 115833 вакциналар бар.
Республикадынъ бас санитар врачы Николай Павлов буьгуьн аьрекет этетаган тыйдажылык шараларды сакламага маслагат берди. Ол, бас деп, маскалар ман юруьв йорыгын тутув эм дезинфекциялык шараларды коьруьв.