Россияда коронавирус маразы ман авырыганлардынъ саны оьсип келеди. Коронавирус маразынынъ янъы штаммы айлак юкпалы экени акында куьн сайын эситип келемиз.

«Омикрон» колдан-колларга, бир заттынъ уьстиннен ысласа, эсиктинъ ыславышыннан эм сондай баска затлардан юкпага болады. Сол себептен яйылув маразыннан коршаланув амалларынынъ кереклиги бек актуальли болады, деп белгилейди «Шоьл тавысы» республикалык газетасынынъ электронлы кебининъ куллыкшысы Зухра Ваисова.
– Аьдемлер парахатланганлар, кайбир заманларда маскады да такпага мутып, оьзлерин юкпалы мараздан коршаламага мутадылар. «Омикрон» – енъил оьтетаган мараз деген ой янъылыс болады. Юкпалы мараздынъ басы, айтпага, ол «Дельта» яде «Омикрон» болсын бир кепте басланады. «Омикрон» бек юкпалы эм дуныя бойынша тез яйылып барады. Тезден «Омикрон» деген штаммы астында яйылув маразынынъ 5-нши толкыны басланувын саклаймыз. Бизде аьли де сол яйылув маразынынъ 5-нши толкынына аьзирленмеге заман бар. Сол заман ишинде биз вакцинацияды эм ревакцинацияды оьтип, келеятырган маразыннан оьзимизди сакламага болаякпыз.
Ногай районында вакцинация этуьв мыратта баьри аьллери де туьзилгенлер. Онда вакцинацияды этпеген аьдемлерге куьн сайын барып прививка этпеге амаллары бар. Районнынъ баьри яшавшыларын да оьз ден савлыгы акында ойлап, вакцинады эттирмеге шакыраман. Тек сол заман олар не ерге барса да оьзлерин парахат сезбеге болаяклар, – дейди Зухра Ваисова.