Россия Федерациясынынъ Оькиметининъ кенъесинде Татьяна Голикова коронавирус бойынша аьллерге коьре, элимизде карантин эки юмадан 7 куьнге дейим кыскартылган, власть органлары аьллерди тергеп тураяклар, керек болса, салынган болжал туьрленмеге болады.

«Ковид» заманында больничныйлар кайтип тоьленееги акында да айтылды. Т.Голиковадынъ айтувы ман, мараз куьшленсе, больничныйлар заочно берилеек, социаллык коьтергишлев байыр аьризелер берилмесе де, тоьленеек. Солай ок, Роспотребнадзордынъ янъы токтасыннан сонъ, элимиз бойынша туьрленислер аьзирленеек. Аьлиги заманда мараз бан байланыслы аьллердинъ акында оьз ойы ман Ногай районынынъ Хатын-кызлар советининъ председатели Асият Манкаева боьлисти.
– Коронавируслы инфекциясынынъ 5-нши кезеги элимиздинъ яшавшыларынынъ ден савлыгынынъ кавыфсызлык амалларын туьрлендирмеге туьседи. Республикамызда «Омикрон» штаммы аянланган, мараз бизге де етип туры. Медицина куллыкшыларынынъ сулыбы бар. Больничныйлар заочно туьзетилееги де бек суьйинишли. Аьдемлер поликлиникаларда юрмееклер, маразды сондай аьдемлер коьп ерде таппага болады.
Вакцинация – мараздан сакланувдынъ энъ де куьшли амалы. Эгер аьдем вакцинация оьткен болса, ол «Омикрон» ман авырса да, мараз енъил болып оьтеди, соны врачлар да айтадылар. Мен Дагестан яшавшыларын вакцинацияды оьтпеге аьли де бир кере шакыраман. Вакцинацияды оьтип, коронавирустан коркпай яшайык, – деп айтады «Шоьл тавысы» газетасынынъ корреспондентине А.Манкаева.