Буьгуьнлерде савлай дуныя коронавируслы инфекциясы ман куьрес юритеди. Мараздынъ яйылувын токтатув керегин баьримиз де анълаймыз. Биз, врачлар, бу куьресуьвде коьтергишлевди яшавшылардан куьтемиз, олар оьз гражданлык борышын толтырып, вакцинацияды оьтсе, маразды токтатпага амаллар болар эди.

Мен Буденновск каласында поликлиникада участковый врач-терапевт болып ислеймен. Коронавирус осал иммунитеттинъ маразы тувыл, кайтара, куьшли иммунитет авырувдынъ каты оьтуьвине демевлик береди. Вирусты оьлтиретаган иммунитет аьдемнинъ организмин де кыйнамай болмайды. Прививка алганлар авырымайды деп бирев де айтып болмайды, вакцина мараздынъ авыр кебиннен, оьлимнен коршалайды, баьримиз де буьгуьнлерде мараз кайдай коьп аьдемлерди аькеткенине шайыт болып турымыз. Биревлер каты авырыйдылар, биревлер авырмай коймага боладылар. Эгер аьдем грипп мараз бан бир де авырымаган болса да, коронавирус пан авырыйды. Сога коьре, мен баьрисин де вакцинация оьтинъиз деп шакырув этемен. Бизде вакцина алмага амал бар болган сонъ, баьримиз де сол амал ман пайдаланайык.
Мен оьзим вакцинацияды оьттим, неге десе поликлиникага келген пациентлердинъ кавыфсызлыгы акында да мен ойланаман. Уьйде де балалар бизден авырувды алып коймасын деп мен де, атасы да прививкады алдык.
Мараз кетер, тек сога баьримиз де колдан келген амалларды этейик.
Г.Култаева, врач-терапевт.