Аьр бир аьдемнинъ бас борышы – вакцинация исинде катнасув, бу зат бизге яман мараз бан куьреспеге амал береди. Буьгуьнлерде Ногай районында 8000-га ювык аьдем вакцина алганлар. Бу сорав бойынша оьз ойы ман Ногай райбольницасынынъ УЗИ врачы Фаризат Алыпкаш кызы Абдулмусаурова боьлисти.

– Вакцинация – коронавируслы инфекцияга карсы маьнели амал. Аьр бир врачтынъ куллыгынынъ басы – тоьгеректегилердинъ ден савлыгын саклав. Биз, врачлар, маразды йойытув ниет баьри амалларды да аламыз. Бизге келген аьр бир пациент сеним мен келмеге керек – йогары дережеде эмленуьв алып, ден савлыгы берк болып кетпеге. Биз аьр дайым авырувлыларга эм баьри яшавшыларга вакцинацияды оьтпеге эм коронавирустынъ яйылувын токтатпага шакырув этемиз.
Баьримиз де мараздынъ йыракка кеткенин, аьдемлер парахат орамларда юргенин, иске барганын, баска аьдемлер мен катысканын суьемиз. Сонынъ уьшин биз вакцинады алмага керекпиз, оьзимизге эм тоьгеректегилерге кавыфсыз аьллер туьзбеге керекпиз. Оьз гражданлык борышын толтырган инсан коронавирусты енъуьвге бир абытка ювык болады.
Мен оьзим вакцинацияды оьттим, неге десе аьдемлер мен ислеймен, оларды авыртып коярман деп коркаман, аьр бир врач авырувлылар акында каьр шекпеге керек, – деп айтты «Шоьл тавысы» республикалык газетасынынъ корреспондентине Ф.Абдулмусаурова.