Вакцинация – ол коронавирус яйылув маразын оьрленип барувын токтатув уьшин энъ пайдалы амал болады, деп боьлиседи оьз ойы ман Терекли-Мектеб авылынынъ Кадрия атындагы орта мектебининъ педагог-психологы Эльмира Еналиевна Аджимуллаева:

– Биз буьгуьнлерде коронавирус маразын элимиз бойынша ясарып барувын коьремиз. Вирус уйклап турмайды. Куьн сайын авырыганлардынъ саны оьсип барады. Савлайымызга да маьнели коркыныш тувдырган зарарлы яв ман сав дуныя бойынша куьрес бардырылады. Буьгуьнлерде яйылув коронавирус маразы тек авырыган аьдемге тувыл, онынъ тоьгеректегилерине де кавыфлык тувдыратаганы биревде де шекленуьв тувдырмайды. Мараздынъ кайтадан ясарып барувын тек вакцинация токтатып болаяк. Ол аьдемде авырувга иммунитетти беркитпеге ярдамласады. Вакцина алганларга да мараз юкпага болады, болса да олар сол юкпалы кастады енъил оьтедилер. Прививка этуьвимиз бен биз оьзимизди эм касымыздагыларды коршалаякпыз. Мектебимиздинъ педагогикалык ис коллективи окувшыларынынъ эм оьз ден савлыгын кавыфсызландырув ниетте вакцинация эттирди.
Сыйлы ердеслеримиз!
Биз, аьр кимимиз де алдынгы яшав аьллерине кайткымыз келеди. Тек сол затка вакцинация себеплик этпеге болаяк. Сонынъ уьшин мен сизди баска затларга сенип калмай, прививкады заманы ман этпеге шакыраман. Вакцинацияды эттируьв акында баьрисининъ де онъайлыгынынъ пайдасын эм савлайымыздынъ да ден савлыгын ойлап дурыс сайлавынъызды этпеге шакыраман. Келеектегимиз уьшин эм мараз юкпага болады деп, коркынышта яшамайык.
Вакцинацияды оьтип оьзимизди эм оьз ювыкларымызды коршалайык, – дейди оьз шакырувында Эльмира Аджимуллаева.